Օգոստոսի 15-ին` գիշերը ժամը ժամը 01.30-ի սահմաններում, ոստիկանության Երևան քաղաքի վարչության հերթապահ մասից Շենգավիթի բաժնում հաղորդում է ստացվել, որ իրենց է զանգահարել Երևան քաղաքի 19-ամյա մի բնակչուհի և հայտնել, որ Երևանյան լճի հարևանությամբ գտնվող բենզալցակայանի մոտ իրեն ուզում են ծեծել:

Դեպքի վայր մեկնած ոստիկանության ծառայողները ժամը 01.45-ին Երևանյան լճի հարակից տարածքից բերման են ենթարկել 1992 թ. ծնված Աբրահամ Գ.-ին: Նույն օրը` ժամը 02.10-ին, աղջիկը ոստիկանությունում հաղորդում է տվել, որ Աբրահամ Գ.-ն լճի մոտակայքում, վիճաբանության ժամանակ, ձեռքերով ու ոտքերով հարվածներ է հասցրել իր գլխին և մարմնի տարբեր մասերին' պատճառելով վնասվածքներ:

Ոստիկանների ձեռնարկած հետագա միջոցառումներով պարզվել է, որ երեք օր առաջ՝ օգոստոսի 12-ի երեկոյան, Աբրահամ Գ.-ն հեղինակել է մեկ այլ հանցագործություն. Բագրատունյաց փողոցում գտնվող «Երևան Սիթի» սուպերմարկետի մոտ դանակի սպառնալիքով 17-ամյա մի երիտասարդից հափշտակել է «Սամսունգ» բջջային հեռախոս և 10.000 դրամ: 

Ոստիկանությունը հայտնում է, որ նշանակվել է դատաբժշկական փորձաքննություն: Հափշտակվածն առգրավված է: Աբրահամ Գ.-ն ձերբակալված է: Կատարվում է նախաքննություն: