Տեսանյութեր
Լուսանկարներ
Հայաստանի պետական պարտքը սահուն մոտենում է 14 միլիարդ դոլարին
2025 թվականի հունիսի վերջի դրությամբ Հայաստանի պետական պարտքը կազմել է մոտ 13.9 մլրդ ԱՄՆ դոլար։ Սա արտաքին և ներքին պետական պարտքի հանրագումարն է։ Ինչպես վկայում են Ֆինանսների նախարարության տրամադրած տվյալները, տարեսկզբի համեմատ պարտքն աճել է 1 մլրդ դոլարով կամ 7.9%-ով։
Արտաքին պետական պարտքը, որը հիմնականում միջազգային պետություններից, կազմակերպություններից վերցված վարկերն ու փոխառություններն են, եվրոբոնդերի թողարկման արդյունքում կուտակված պարտքերը, այս հունիսի վերջի դրությամբ կազմել է 6.9 մլրդ դոլար։ Առաջին կիսամյակի ընթացքում արտաքին պարտքն աճել է 489 մլն դոլարով կամ 7.6%-ով։
Արտաքին պարտքի շարքին «դասվեց» նաև այս մարտին Հայաստանի կողմից միջազգային կապիտալի շուկայում եվրոբոնդերի (եվրապարտատոմսերի) թողարկման արդյունքում ստացված 750 մլն ԱՄՆ դոլարը։ Եկել էր հին պարտքերը մարելու ժամանակը, և պետությունը այդ նպատակով նոր պարտք ներգրավեց։ Առաջին անգամ չէր, որ Հայաստանը դիմում էր եվրոբոնդերի օգնությանը։
Պետությունը նոր պարտքեր ներգրավելուն զուգահեռ մարում է հին պարտքերի տոկոսավճարներն ու մայր գումարները։
Միայն տոկոսավճարների գծով այս կես տարում պետական բյուջեից ծախսվել է 169.4 մլրդ դրամ։ Սա առավելապես ոչ թե արտաքին պարտքի գծով է (45.7 մլրդ դրամ), այլ ներքին (123.7 մլրդ դրամ)։
Հայաստանի ներքին պետական պարտքը հունիսի վերջի դրությամբ ևս շուրջ 6.9 մլրդ դոլար է։ Տարեսկզբի համեմատ այն ավելացել է 8.2%-ով կամ 521 մլն դրամով։
Հիշեցնենք, որ 2024 թվականի տվյալներով՝ պարտքի բեռը պահպանվել է ՀՀ հարկաբյուջետային կանոններով թիրախավորվող 50%-ից ցածր մակարդակում. Կառավարության պարտք/ՀՆԱ ցուցանիշը կազմել է 48.3%:
Տես նաև՝
Մեկնաբանել