Վանաձորի քաղաքապետի պաշտոնի համար առաջադրված 5 թեկնածուներից մեկը Տիգրան Գրիգորյանն է, ով 2000 թվականից մշտական բնակություն չունի Վանաձորում և ծանոթ չէ համաքաղաքացիներին: Առաջադրման դիմումն էլ ամենավերջին պահին է ներկայացրել` վանաձորցիների մոտ կասկածներ առաջացնելով, թե ձևական առաջադրված է գործող քաղաքապետի կողմից`ինքնաառաջադրվածներից «ձայն փախցնելու» համար: Այդպես կարծելու առիթ է տալիս նաև այն, որ Տիգրան Գրիգորյանը մասնակցում էր վերջին խորհրդարանական ընտրություններին թիվ  7 ընտրատարածքում, որտեղ առաջադրված էին Սամվել Ալեքսանյանն ու Նիկոլ Փաշինյանը, և, ըստ շրջանառվող խոսակցությունների, այն ժամանակ էլ Սամվել Ալեքսանյանի կողմից էր առաջադրված: Այս կասկածների շուրջ «Հետքը» զրուցել է քաղաքապետի թեկնածուի հետ:

-Ինչո՞ւ որոշեցիք թեկնածություն առաջադրել քաղաքապետի պաշտոնի համար:

-Վանաձորում բազմաթիվ խնդիրներ կան: Մենք յուրաքանչյուրս, ապրելով քաղաքում, չենք կարողանում մեզ համար գտնել այն անհրաժեշտ միջավայրը, որտեղ կարելի է հետաքրքիր ժամանց անցկացնել, որտեղ կարելի է լավագույն կրթություն ստանալ, այլ տեսանկյուններից ինքնադրսևորվել:

-Բուհն ավարտելուց հետո`2000 թվականից, Վանաձորում չեք ապրում, արդյո՞ք ծանոթ եք քաղաքի խնդիրներին:

-Երբ աշխատանքի բերումով կամ կրթութուն ստանալու պատճառով բացակայել եմ, կարծում եմ հարգելի պատճառ է: Եղել է ժամանակ, մշտապես արտասահմանում եմ եղել, ժամանակ, որ Երևանում եմ գտնվել, բայց վերջին հաշվով ապրել եմ այս քաղաքի խնդիրներով: Մի ուրիշ փաստ բերեմ: Երբ որ ԱՄՆ-ից եկա, 2011 թվականն էր, «Արցախ» պուրակում իմ ուշադրությունը գրավեց բարձր խոտերի դեզ հիշեցնող վիճակը: Հավաքեցի 6 ՀԿ-ների ստորագրություններ և պահանջ-նամակով դիմեցինք քաղաքապետին`ասելով որ համաձայն չենք այս վիճակի հետ:

-Արդյո՞ւնքը:

-Քաղաքապետարանից հրավիրեցին «Մոսկվա կինոթատրոնի» տերերին, պահանջեցին, որ բարեկարգում լինի: Եթե նկատել եք, անցած տարի ինչ-որ թեթև կանաչեղենը հնձվեց, բարեկարգ վիճակ ստեղծվեց:

-Անձամբ ես որևէ փոփոխություն չեմ նկատում: Իսկ Դուք ներկա եղե՞լ եք քաղաքապետարանում հրավիրված այդ քննարկմանը:

-Ոչ, լրատվամիջոցներից իմացա, որ տերերն ասել են, որ առաջիկա 2 տարիների ընթացքում թատրոն կառուցել չեն կարող, բայց գոնե բարեկարգման աշխատանքը տեղի կունենա: Իրականում չենք տեսնում այդ աշխատանքը: Պետք է մեխանիզմներ գտնենք պայքարելու: Ինքս մի քայլ արդեն արել եմ այդ ուղղությամբ:

-Քայլը արեցիք ու հետևողական չեղաք:

-Հետո խորհրդարանական ընտրությունների բովի մեջ էի, հիմա էլ քաղաքապետի ընտրությունների բովի մեջ եմ: Գուցե արդարացում չէ, բայց զբաղվածությունս թույլ չտվեց հետևողական լինեմ:

-Խորհրդարանական ընտրություններում պատգամավորության թեկնածու էիք առաջադրվել թիվ 7 ընտրատարածքում: Երևանում Ձեզ ճանաչո՞ւմ էին, որ ձայն տային:

-Քիչ մարդիկ էին ճանաչում: 20 օրվա աշխատանքի ընթացքում 30 հազար ընտրողից հավաքեցինք 1262 ձայն: Տպավորիչ արդյունք է:

-Երևանում չէին ճանաչում, կամ, Ձեր խոսքով, քիչ թվով մարդ էր ճանաչում: Իսկ վանաձորցի՞ն, Ձեզ ճանաչո՞ւմ է:

-Չեմ կարծում, որ հանրային դեմք եմ, բոլորը կիմանան, բայց բավականին թվով մարդիկ գիտեն: Փորձելու ենք որոշակի տեխնոլոգիաների կիրառմամբ ավելի ճանաչվել:

-Ինչո՞ւ խորհրդարանական ընտրություններում Վանաձորում չառաջադրվեցիք:

-Այստեղ Էդմոն Մարուքյանն էր առաջադրվել: Նրա հետ համագործակցում էինք նախընտրական շրջանում, նպատակահարմար չէր լինի, որ ձայները կիսեինք: Մյուս ընտրատարածքները աշխարհագրորեն բավականին ընդլայնված էին, և ընտրարաշավը կազմակերպելու տեսանկյունից տեխնիկապես դժվարություններ կունենայինք: Բացի այդ, այլ նպատակ էինք հետապնդում: Ուզում էինք ցույց տալ, որ երկրում չպիտի լինեն այնպիսի ընտրատարածքներ, որտեղ ավանդաբար առաջադրվում է 1 թեկնածու, և որևէ մեկը չի համարձակվում թեկնածություն առաջադրել:

-Եվ, փաստորեն, գոհ էիք Ձեր ձևական առաջադրումից:

-Ձևական չէր: Լավ, ես այդ ծանրության տակ մտել եմ, մի որոշակի թվով մարդկանց հնարավորություն եմ տվել իրենց թերթիկը անվավեր չսարքել, այլ գնալ, գիտակցաբար հասկանալով, որ ինքը հաղթող թեկնածուին չի ընտրում, այնուամենայնիվ իր քվեարկելու իրավունքը իրականացնել:

-Առաջիկա ընտրություններում էլ ե՞ք նույն հոգեբանությամբ առաջնորդվում:

-Ոչ: Իհարկե բարդություններ կլինեն, ռեսուրսի տեսակետից առնվազն 2 թեկնածուի զիջում եմ: Գործող քաղաքապետը, նաև ԲՀԿ-ի ներկայացուցիչը առավելություններ կունենան: Պարզ է, որ քաղսքապետը տիրապետում է իշխանական ռեսուրսին: Ֆինանսական ռեսուրսներ էլ, բնականաբար, կարելի է ենթադրել, որ ունի: Պարզ է, որ ԲՀԿ-ն որոշակի ռեսուրսի է տիրապետում`թե ֆինանսական, թե որպես քաղաքական ուժ:

-Ֆինանսական ռեսուրսն ինչպե՞ս է կիրառվելու:

-Պրատիկայում կա, որ ֆինանսական ռեսուրսը կիրառվում է նաև օրենքով արգելված ձևերով:

-Ընտրակաշառքի՞ ձևով:

-Այո: Չեմ կարող ենթադրություն անել`այդ ձևով կկիրառվի, թե ոչ, բայց ինքը որպես հնարավորություն գոյություն ունի:

-Իսկ չեք կարծո՞ւմ, որ Ձեր պայքարը ինքնաառաջադրված թեկնածուների հետ է:

-Ընդհանրապես այդպիսի գնահատական չեմ տալիս, թե ով է ամենալուրջ մրցակիցը: Դրանով կամ թուլացնում կամ ուժեղացնում եմ իմ մրցակիցերից յուրաքանչյուրին:

-Ասացիք, որ համագործակցում էիք Էդմոն Մարուքյանի հետ, իսկ նրա ընկերոջ` առաջադրված թեկնածու Կարեն Թումանյանի հետ ի՞նչ հարաբերությունների մեջ եք:

-Կարեն Թումանյանին ճանաչում չեմ, մտերիմ շփում չունենք: Ունեմ համակրանք: Վերջին հաշվով նա էլ է նմանատիպ քայլ անում`լինելով երիտասարդ, իր ծառայութունն է մատուցում:

-Ներկայացրեք ձեր թիմը:

-Անկուսակցական եմ, ունեմ լավ ընկերներ, ծանոթներ ՀԿ դաշտում, բիզնես հատվածից, անուններ չեմ տա: Երևանից պրոֆեսիոնալ մարդիկ կան, որ կգան այստեղ մեր փիարին կօգնեն, մոտավորապես կորիզը կազմում է  5-6 մարդ:

-Ընկերները միայն Երևանի՞ց են, Վանաձորից չկա՞ն:

-Վանաձորից էլ կան, ուղղակի չեմ ուզում անուններ տալ: Քաղաքացիական նախաձեռնութուն;

-Ինչպես խորհրդարանական ընտրությունների ժամանակ էին ասում, որ առաջադրված եք Սամվել Ալեքսանյանի կողմից, հիմա էլ նույն ձևով ասում են, որ Վանաձորի քաղաքապետի կողմից եք մասնակցում ընտրությանը:

- Իմ հանդեպ արվել է սև քայլ: Այդ թեզը առաջ քաշող մարդուն ասել եմ, որ սուտ է խոսում, չի կարողացել հերքել: Շաբլոն տարածված հերյուրանքի մեխանիզմ է:

-Չեք էլ մասնակցե՞լ Ալեքսանյանի հետընտրական խնջույքին:

-Էլի հերյուրանքների շարքից է: Այդ խնջույքին չէի կարող լիենլ, այդ խնջույքը ընտրյալների համար է: Իսկ մենք հասարակ քաղաքացիներ ենք:

-Մինչդեռ չեք կարող հերքել, որ օրերս քաղաքապետ Դարբինյանի հետ Թեժլեռում արշավի եք մասնակցել:

-Չեմ հրաժարվի: Ես գիտեի, որ Թեժլեռում երիտասարդական միջոցառում է կազմակերպվում: Ինքս ուզեցի հասկանամ`ինչ է կատարվում մեր քաղաքում: Գնացի, քաղաքապետի հետ շփվեցի:

-Ուղղակի շատ սերտ է եղել ձեր շփումը, ինչը նախընտրական այս շրջանում լուրջ կասկածների տեղիք է տալիս:

-Քաղաքապետին գիտեմ: Եվ բնական է`եթե եկել ես, որպես վտարանդի չպետք է մեկուսանաս, պետք է շփվես:

-Նախորդ քաղաքապետի ընտրություններում քանի՞ անգամ եք Ձեր ձայնը տվել Սամվել Դարբինյանին:

-Առաջին ընտրվելու ժամանակ ձայն եմ տվել, հետագայում վստահ չեմ: Չեմ ուզում ձեզ խաբեմ ու ասեմ`ում եմ ձայն տվել հաջորդ ընտրություններին:

-Առաջադրումների հերթականությամբ` քաղաքապետ Սամվել Դարբինյանն ու փաստաբան Կարեն Թումանյանն առաջին օրն են հանձնել իրենց փաստաթղթերը, հետո`ԲՀԿ թեկնածուն`  էդիկ Կարախանյանը: Այսինքն, Ձեր իսկ բնորոշմամբ, «առավելություն ունեցող» մրցակիցներն արդեն հայտնի էին:  Ինչո՞ւ չէիք նրանցից հետո առաջադրվում, ո՞ւմ էիք սպասում:

-Ես հետազոտում էի առաջադրվողներին`հասկանալու համար, որ կա գուցե ինչ-որ թեկնածու, որ կարող եմ միանալ ու ինքս չառաջադրվել, կամ չգիտեմ

-Նախավերջին առաջադրումը եղել է Տարոն Ապրեսյանինը`փաստաթղթերի ընդունման նախավերջին օրը, որից հետո առաջադրվեցիք Դուք`ամենավերջին պահին: Գուցե հենց նրա առաջադրմա՞նն էիք սպասում:

-Չէ, ես տեղյակ եմ եղել, որ նա պետք է առաջադրվեր:

-Ու երբ առաջադրվեց, Դուք էլ վերջապես Ձեր որոշո՞ւմը կայացրիք:

-Լավ, եթե ուզում եք, այդպես մտածեք: Դրա մեջ էլ վատ բան չեմ տեսնում: Բայց Ապրեսյանի հետ ընդհանրապես խնդիր չունեմ: Կարծում եմ՝ ինքն էլ ինձ հետ չպիտի ունենա խնդիր: