Գազա քաղաքում ավելի քան 514 հազար մարդ հայտնվել է ծայրահեղ սովի պայմաններում։ Այդ մասին նշվում է Սննդամթերքի անվտանգության գնահատման միջազգային նախաձեռնության կոմիտեի զեկույցում։ Այդ շրջանում սովի մակարդակի գնահատականը առաջին անգամ բարձրացվել է մինչև 5-րդ աստիճանի, որը Սննդի անվտանգության փուլերի ինտեգրված դասակարգման (IPC) վատագույն մակարդակն է։

IPC-ի գնահատմամբ՝ սեպտեմբերի վերջին այն անձանց թիվը, որոնք ամենօրյա ռեժիմով բախվում են սովի խնդրին, սպառնում է հասնել մինչև 641 հազարի, իսկ «աղետալի պայմանները» կտարածվեն Գազայի հատվածի հարավային շրջաններ՝ Դեյր-ալ-Բալահ և Խան-Յունիս։ Այնտեղ իրավիճակը ներկայումս գնահատվում է 4-րդ աստիճան։

Reuters-ը նշում է, որ որ նման դասակարգման համար բնակչության առնվազն 20%-ը պետք է զգա սննդի սուր պակաս։ Դա հավասար է նրան, որ յուրաքանչյուր երրորդ երեխան տառապում է թերսնուցումից, և ամեն օր 10 հազար մարդուց երկուսը մահանում են սովից և հիվանդություններից: Ընդ որում, նույնիսկ եթե տարածաշրջանը չի հասնում սահմանված շեմի ֆորմալ արժեքներին, IPC-ն կարող է որոշել, որ այնտեղ գտնվող տնային տնտեսությունները բախվում են սովի պայմանների, որոնք ներառում են սուր թերսնուցումը, աղքատությունը և մահը:

• Մարդասիրական կազմակերպությունները ահազանգում են. Գազայում զանգվածային սովը տարածվում է
  

BBC-ն էլ հիշեցնում է, որ IPC-ն ինքնին չի հայտարարում սովի մասին, այլ տրամադրում է վերլուծություն, որի հիման վրա կառավարությունները, կազմակերպությունները և գործակալությունները կարող են անել հայտարարություններ կամ ընդունել պաշտոնական հռչակագրեր: Այս համակարգից օգտվում է նաև Միավորված ազգերի կազմակերպությունը։

Իսրայելում «իսպառ հերքում են» սովի մասին գնահատականները, որոնք հրապարակել է IPC-ն։ Պաղեստինյան տարածքներում Իսրայելի կառավարության գործունեության համակարգման կոմիտեն (COGAT) հայտարարել է, որ զեկույցի հեղինակները «միտումնավոր անտեսել են» իրավիճակի վերաբերյալ այն տվյալները, որոնք մինչ հրապարակումը կայացած հանդիպման ժամանակ ներկայացրել իսրայելական կողմը։

«IPC-ի զեկույցը հիմնված է մասնակի և անվստահելի աղբյուրների վրա, որոնցից շատերը կապված են ՀԱՄԱՍ-ի հետ։ Այն բացահայտորեն անտեսում է փաստերը ու լայնածավալ մարդասիրական ջանքերը, որոնք գործադրում են Իսրայել Պետությունը ու նրա միջազգային գործընկերները»,- ասված է կոմիտեի հայտարարության մեջ։

Իսրայելի ԱԳՆ-ից էլ հայտարարել են, որ IPC-ի զեկույցը «հիմնված է ՀԱՄԱՍ-ի ստի վրա»։ «Անհավատալի է, բայց IPC-ն խեղաթյուրել է իր սեփական կանոններն ու անտեսել իր սեփական չափանիշները, որպեսզի կեղծ մեղադրանքներ ներկայացնի Իսրայելի դեմ՝ միայն այս զեկույցում 30%-ից մինչև 15%-ի իջեցնելով (սովի որոշման` խմբ.) շեմն ու ամբողջովին անտեսելով երկրորդ չափանիշը՝ մահացության մակարդակը»,- հավելել է Իսրայելի արտաքին քաղաքական գերատեսչությունը։

Լուսանկարը՝ ABC News-ից