Շուկայի վերահսկողության տեսչական մարմնից հայտնում են, որ ուժի մեջ են մտել «Թանկարժեք մետաղների մասին» օրենքում մի շարք փոփոխություններ և լրացումներ, որոնք սահմանում են թանկարժեք մետաղներից պատրաստված իրերի որակի վերահսկման և առուվաճառքի նոր կանոններ։

«Օրենքի 2-րդ հոդվածում կատարվել է ձևակերպման փոփոխություն, որի համաձայն՝ թանկարժեք մետաղներից պատրաստված իրերի վրա պարտադիր է ոչ միայն հարգադրոշմը, այլև անվանանիշը և տարբերանիշը։

Թանկարժեք մետաղների և դրանցից պատրաստված իրերի մասնագիտացված, այդ թվում՝ մանրածախ առուվաճառքը իրականացվում է միայն այն պարագայում, եթե իրերը ունեն հարգադրոշմ, անվանանիշ և տարբերանիշ, բացառությամբ սույն օրենքի 6-րդ հոդվածի 11-րդ մասով նախատեսված իրերի։

Եթե պարտադիր հարգորոշման և հարգադրոշմման ենթակա թանկարժեք մետաղներից պատրաստված իրերի վրա առկա հարգադրոշմը, անվանանիշը կամ տարբերանիշը չեն համապատասխանում օրենքի պահանջներին, ապա այդ իրերի հարգորոշման և հարգադրոշմման պարտականությունը կրում է մանրածախ առուվաճառք իրականացնող անձը՝ իր հաշվին։

Այս փոփոխությունների նպատակն է բարձրացնել թանկարժեք մետաղներից պատրաստված իրերի որակի վերահսկողությունը, ապահովել թափանցիկություն և պաշտպանել սպառողների իրավունքները»,-ասված է հաղորդագրության մեջ։