Քաղաքացիներն այսօր՝ օգոստոսի 29-ին, բողոքի ակցիա էին իրականացնում Ծիծեռնակաբերդում՝ իրենց դժգոհությունը հայտնելով Հայոց ցեղասպանության հուշահամալիրի բարեկարգման աշխատանքներից։

Հայոց ցեղասպանության թանգարան-ինստիտուտի նախկին տնօրեն Հայկ Դեմոյանն այդ աշխատանքները բնութագրում է որպես ավերման, ոչ թե՝ բարեկարգման, ինչպես նաև հարցի բարոյական տեսանկյունից մտահոգություն է հայտնում, որ այդ աշխատանքը վստահվել է ոչ հայ բանվորների, ովքեր չեն կարող խորապես ըմբռնել շինության արժեքը, նաև հավելելով, որ մեղադրանք չի ներկայացնում աշխատանքային միգրանտներին, որ երկրից էլ ուզում է, որ լինեն։

Նրա կարծիքով՝ անհրաժեշտություն չկար արտաքին պատերի սալիկները քանդել, հանել, բավարար էր միայն համալիրի ներսում կոսմետիկ աշխատանքներ կատարել․ այս պատճառով էլ նախագծի բյուջեն ուռճացված է, իսկ աշխատանքներն իրականացնում է այն նույն ընկերությունը, որը վերանորոգել էր Փակ շուկայի գետնանցումը և Նոր Հաճնի կամուրջը, որոնց վերանորոգումից հետո կրկին վերանորոգելու կարիք է եղել։

«Ցեղասպանության հուշահամալիրի ու թանգարանի վերանորոգման համար պետությունը հատկացրել է շուրջ 800 միլիոն դրամ։ Դրանք մեծ միջոցներ են, որոնք ուղղվում են, որպեսզի երկրի կարևորագույն վայրերից մեկն ունենա պատշաճ և անհրաժեշտ պայմաններ»,- այս մասին օգոստոսի 27-ին մամուլի ասուլիսի ժամանակ հայտարարել էր ԿԳՄՍ նախարար Ժաննա Անդրեասյանը՝ հավելելով, որ թե՛ հուշահամալիրը, թե՛ թանգարանը ամբողջությամբ նույն տեսքով վերականգնվելու են անհրաժեշտ աշխատանքներից հետո»։