Կառավարությունն այսօր Արմավիրի մարզպետի պաշտոնում նշանակեց նույն մարզի Մեծամոր համայնքի ղեկավար Վահրամ Խաչատրյանին: Վերջինս Մեծամոր համայնքի ղեկավար էր ընտրվել 2021թ. դեկտեմբերի 5-ին կայացած ընտրությունների արդյունքներով:

Վահրամ Խաչատրյանի «թռիչքային» կարիերան սկսվել է 2018թ. իշխանափոխությունից հետո: Նախկին իշխանությունների օրոք Վ. Խաչատրյանը «Հանրապետական» կուսակցության անդամ էր և 2016թ. ընտրվել էր Արմավիրի մարզի Նորապատ համայնքի ղեկավար: 

2018թ. իշխանափոխության օրերին Վ. Խաչատրյանը հայտարարեց, թե դադարեցնում է ՀՀԿ-ին անդամակցությունը և միանում է ժողովրդին: Դեռևս 2018թ. մայիսի 8-ին «Հետք»-ի հետ զրույցում ասել էր, թե իրեն այլևս հանրապետական չի համարում:

«Կուսակցական տոմսս վայր եմ դրել: Կուսակցությունից հրաժարվեցի, քանի որ ժողովրդիս կողքին եմ եղել, պատճառը միայն դա է եղել: Ճիշտն ասած՝ կուսակցությունն իմ համար երկրորդական բան է, դրա համար կարևորություն չեմ տալիս»,- ասել էր Վահրամ Խաչատրյանը:

Կուսակցական լինելը չկարևորող Վահրամ Խաչատրյանն այժմ արդեն «Քաղաքացիական պայմանագիր» կուսակցության անդամ է:

Վարչապետ Նիկոլ Փաշինյանը 2021թ. հունիսի 29-ի որոշմամբ Վահրամ Խաչատրյանին նշանակեց Արմավիրի մարզպետի տեղակալ, իսկ ամիսներ անց՝ նոյեմբերի 2-ին, վարչապետի որոշմամբ նա նշանակվեց Մեծամոր համայնքի ղեկավարի ժամանակավոր պաշտոնակատար՝ ազատվելով մարզպետի տեղակալի պաշտոնից: Դրանից հետո էլ, Մեծամոր համայնքի ավագանու ընտրություններում գլխավորելով «Քաղաքացիական պայմանագիր» կուսակցության ցուցակը, ընտրվել է համայնքի ղեկավար:

Նշենք, որ Արմավիրի մարզպետի պաշտոնը թափուր է 2025թ. հուլիսից, երբ մարզպետ Արգիշտի Մեխակյանը նշանակվեց Վաղարշապատ համայնքի ղեկավարի պաշտոնակատար:

Պաշտոնյայի կինը հայտարարագրեր չի ներկայացնում

Վահրամ Խաչատրյանն առաջին անգամ գույքի, եկամուտների հայտարարագիր է ներկայացրել 2020թ.-ին, երբ Նորակերտ համայնքի ղեկավարն էր: Այդ ժամանակ հայտարարագրել էր միանձնյա սեփականության իրավունքով իրեն պատկանող 4 միավոր անշարժ գույք՝ ավտոտնակ և 2 հողամաս Նորապատ գյուղում, ինչպես նաև հասարակական նշանակության շինություն Արմավիր քաղաքում: Ի դեպ, հողամասերից մեկը, ըստ հայտարարագրի, 2020թ. գնել է ընդամենը 100 հազ. դրամով:

Վ. Խաչատրյանը հայտարարագրել է նաև TOYOTA և CITROEN մակնիշի ավտոմեքենաներ: Իսկ ունեցած  BMW մակնիշի ավտոմեքենան 2020թ. վաճառել է 6 մլն դրամով: 

2020թ. հայտարարագրի համաձայն՝ Վահրամ Խաչատրյանն ունեցել է 20 մլն 260 հազ. դրամ բանկային ավանդ: Այդ ժամանակ Նորապատ համայնքի ղեկավարը հայտարարագրել է նաև 2005թ. նվեր ստացած 20 մլն դրամ արժողության ոսկյա զարդերն ու 33 հազ. ԱՄՆ դոլար արժողության Rolex ժամացույցը:

Վ. Խաչատրյանը բանկային հաշվին ունեցել է 0 դրամ և ընդամենը 27 ԱՄՆ դոլար: Իսկ կանխիկ` 50 մլն դրամ, 40 հազ. ԱՄՆ դոլար և 80 հազ. եվրո: Եկամուտը եղել է Նորապատի համայնքապետարանից ստացած աշխատավարձը՝ մոտ 3 մլն դրամ:

Այս տարիների ընթացքում Վահրամ Խաչատրյանի կապիտալն աճել է: Մասնավորապես՝ արդեն Մեծամորի համայնքի ղեկավարի պաշտոնում ներկայացրած 2024թ. տարեկան հայտարարագրի համաձայն՝ 2022թ. Երևանի Կենտրոն վարչական շրջանում գնել է 2 ավտոկայանատեղի: 2021թ. մոտ 50 մլն դրամով ձեռք է բերել նաև բնակարանի ձեռքբերման իրավունք Երևանի Արշակունյաց պողոտայի հարևանությամբ գտնվող նորակառույց շենքում:

2024թ. 7 մլն 344 հազ. դրամով գնել է MERCEDES-BENZ մակնիշի ավտոմեքենա: Իսկ այդ ընթացքում վաճառել է TOYOTA մակնիշի ավտոմեքենան:

Ինչ վերաբերում է դրամական միջոցներին, Վ. Խաչատրյանի բանկային հաշվին, 2024թ. դեկտեմբերի 31-ի դրությամբ, եղել է ընդամենը 2469 դրամ, իսկ կանխիկ ունեցել է 3 մլն 800 հազ. դրամ, 20 հազ. ԱՄՆ դոլար և 78 հազ. 500 եվրո:

2024թ. դեկտեմբերի 31-ի դրությամբ Վահրամ Խաչատրյանն ունեցել է մոտ 52 մլն դրամ վարկ, եկամուտը կազմել է 13 մլն 500 հազ. դրամ:

Նշենք, որ այս տարիների ընթացքում Վահրամ Խարատրյանի կինը՝ Լուսինե Գևորգյանը, հայտարարագրեր չի ներկայացրել Կոռուպցիայի կանխարգելման հանձնաժողով: