Աշխարհի 2026 թվականի առաջնության ընտրական փուլի առաջին տուրում Հայաստանի ազգային հավաքականը տանը 0:5 հաշվով պարտվեց Պորտուգալիայի ընտրանուն։ Հանդիպումը տեղի ունեցավ Երևանի Վազգեն Սարգսյանի անվան «Հանրապետական» մարզադաշտում։

Արդեն 10-րդ րոպեին Պորտուգալիայի կազմում խաղի հաշիվը բացեց Ժոաու Ֆելիքսը։ 11 րոպե անց իր թիմի առավելությունը կրկնապատկեց թիմի ավագ Կրիշտիանու Ռոնալդուն։

32-րդ րոպեին էլ խաղի հաշիվը խոշոր դարձրեց Ժոաու Կանսելուն՝ 0-3։ Հայաստանի հավաքականը առաջին կեսում այդպես էլ դարպասին հարված չկատարեց, թիմերն ընդմիջման գնացին 0-3 հաշվով։

Երկրորդ խաղակեսի մեկնարկից վայրկյաններ անց իր անվան դիմաց դուբլ գրանցեց Կրիշտիանու Ռոնալդուն՝ հաշիվը դարձնելով 0-4:

Կրիշտիանու Ռոնալդուն տոնում է գոլը

Րոպեներ անց պորտուգալացիները ևս մեկ վտանգավոր պահ ունեցան, սակայն այս անգամ մեր տղաներին օգնության հասավ ուղղահայաց դարպասաձողը։

5-րդ գոլից, սակայն, մեր հավաքականը խուսափել չկարողացավ․ 62-րդ րոպեին դուբլի հեղինակ դարձավ նաև Ժոաու Ֆելիքսը։

Երկրորդ կեսում մեր ընտրանին պահեր ունեցավ, սակայն վստահ էր գործում պորտուգալացիների դարպասապահ Դիեգու Կոշտան։ Խաղի մնացած ժամանակահատվածում այլևս գոլեր չգրանցվեցին։

Վաստակած 3 միավորով այս պահին Պորտուգալիայի հավաքականը F խմբում առաջին հորիզոնականում է։
Քիչ անց՝ Երևանի ժամանակով 22:45-ին, Իռլանդիայի մայրաքաղաք Դուբլինում կմեկնարկի մեր խմբի Իռլանդիա-Հունգարիա հանդիպումը:

Հայաստանի ազգային հավաքականն իր հաջորդ հանդիպումը կանցկացնի սեպտեմբերի 9-ին՝ կրկին տանն ընդունելով Իռլանդիայի ընտրանուն:

Լուսանկարները՝ Ֆրունզ Ավետիսյանի / ©Հետք