Անցած շաբաթվա ընթացքում արտակարգ իրավիճակների նախարարության Ճգնաժամային կառավարման կենտրոնում ստացվել է 430 հազարից ավելի զանգ։ Նույն ժամանակահատվածում «1-02» ծառայությունում ստացվել է մոտ 170 հազար, իսկ շտապօգնության ծառայությունում՝ շուրջ 200 հազար ահազանգ։

«Սա վկայում է կարճ ժամանակում բնակչության կողմից «911» ծառայության ձեռք բերած մեծ վստահության մասին։ «911» հեռախոսահամարով ստացված որևէ զանգ չպետք է մնա անպատասխան։ Մարդիկ պետք է իմանան, որ կա այդպիսի մի ծառայություն, որը ցանկացած պահի պատրաստ է օգնության ձեռք մեկնել դժվար իրավիճակում հայտնված մարդուն»,- այսօր՝ ԱԻՆ-ում տեղի ունեցած ամենշաբաթյա խորհրդակցության ժամանակ, ասել է նախարար Արմեն Երիցյանը:

Նա հանձնարարել է նվազագույնի հասցնել ՃԿԿ-ում ահազանգ-արձագանք ժամանակահատվածը։ Շուտով բոլոր հրշեջ մասերում և հրշեջ մեքենաների վրա կտեղադրվեն տեսախցիկներ, որոնք կօգնեն գրեթե ամբողջությամբ վերահսկել արտակարգ պատահարներին արձագանքման գործընթացը։