Այսօր՝ սեպտեմբերի 12-ին, Հայաստանի հետ հարաբերությունների կարգավորմամբ զբաղվող հատուկ բանագնաց Սերդար Քըլըչը ժամանել է Հայաստան։ Հայ-թուրքական սահմանին՝ Մարգարայի անցակետում, նրան դիմավորել է ԱԺ փոխխոսնակ Ռուբեն Ռուբինյանը։

Սա Սերդար Քըլըչի և Ռուբեն Ռուբինյանի արդեն յոթերորդ հանդիպումն է, բայց առաջին անգամ է, որ հանդիպումը տեղի է ունենում Հայաստանում։

Հատուկ  բանագնացների առաջին հանդիպումը տեղի ունեցավ 2022-ի հունվարի 14-ին, Մոսկվայում։ Այս հանդիպումն ավելի շատ ծանոթության նպատակ ուներ։ Բանագնացները նախնական մտքեր էին փոխանակել կարգավորման ընթացքի վերաբերյալ։ 

Ռուբինյանի ու Քըլըչի երկրորդ, երրորդ և չորրորդ հանդիպումները տեղի ունեցան Վիեննայում՝ համապատասխանաբար 2022-ի փետրվարի 22-ին, մայիսի 2-ին և հուլիսի 1-ին։ Չորրորդ հանդիպման արդյունքներով կողմերը պայմանավորվեցին հնարավոր ամենասեղմ ժամկետներում բացել սահմանը երրորդ երկրների քաղաքացիների և դիվանագիտական անձնագիր ունեցողների համար։ 

Հայաստանը նույնիսկ վերակառուցեց Մարգարայի սահմանային անցակետը։ Սակայն,  երրորդ երկրների քաղաքացիների և դիվանագիտական անձնագիր ունեցողների համար սահմանը այդպես էլ չբացվեց։

Ռուբինյանի ու Քըլըչի հինգերորդ հանդիպումը տեղի ունեցավ 2024-ի հուլիսի 26-ին։ Երկու երկրների բանագնացները հանդիպեցին հայ-թուրքական սահմանի Մարգարայի անցակետում։

Վերջին անգամ նրանք հանդիպել էին այս տարվա ապրիլին, Անթալիայում անցկացվող դիվանագիտական ֆորումի շրջանակներում։