«Հետքի» ընթերցողները ահազանգում են, որ մի շարք բժշկական կենտրոններում իրենց մերժում են պետական պատվերի շրջանակում սպասարկելուց՝ պատճառաբանելով, թե «պետպատվերը վերջացել է»։ Ի պատասխան մեր հարցմանը` Առողջապահության նախարարությունը հայտնում է, որ պետպատվերը չի կարող վերջանալ, այն կարող է կազմակերպվել հերթագրման սկզբունքով։

2025 թվականի պետական պատվերի տարեկան բյուջեն կազմել է 135 մլրդ դրամ, որից ծախսվել է 98.9 մլրդը։ Այսինքն` այս տարվա համար նախատեսված բյուջեի մնացորդը 36.1 մլրդ դրամ է, որը ըստ Առողջապահության նախարարության՝ բուժհաստատություններին տրվում է ոչ թե նախապես բաշխված բյուջեով, այլ՝ յուրաքանչյուրը ստանում է` ըստ անհրաժեշտության՝ կատարած աշխատանքի դիմաց։

Յուրաքանչյուր տարի պետական պատվերի տարեկան ծավալը հաշվարկվում է նախորդ տարում փաստացի կատարված աշխատանքների հիման վրա՝ հաշվի առնելով դրանց աճի տեմպը և գների փոփոխությունները: Առողջապահության նախարարությունից հայտնում են, որ ներկայումս իրականացվում են պետական բյուջեով առողջապահությանը հատկացված միջոցների փոփոխության և վերաբաշխման աշխատանքներ:

Պետպատվերը չի կարող վերջանալ։ Եթե հիվանդը բուժհաստատություն է դիմում պլանային բուժման, նրան հերթագրում են այն դեպքում, երբ տվյալ բժշկական ծառայության համար (օրինակ՝ ԿՏ, ՄՌՏ) պետբյուջեից հատկացված գումարը կիսամյակի առաջին հատվածում արդեն օգտագործված է ավելի քան 20%-ով։ Այսինքն՝ քանի դեռ օգտագործված գումարի չափը չի անցել այդ շեմը, պլանային հիվանդներին ընդունում են առանց հերթագրելու։ Երբ գումարի օգտագործումը անցնում է 20%-ը, նոր պլանային դիմողները սկսում են հերթագրվել։ Իսկ շտապ դեպքերում (կյանքին սպառնացող, անհետաձգելի), մարդուն անմիջապես են ընդունում՝ անկախ գումարի սահմանափակումից։