«Շատերիս վստահությունն անթույլատրելի չարաշահած Նիկոլ Փաշինյանին սպասում է հերթական ձախողումը»,- իր ֆեյսբուքյան էջում գրել է ԱՆԻՖ-ի նախկին տնօրեն Դավիթ Փափազյանը։

Սա Փափազյանի առաջին հրապարակային մեկնաբանությունն է ԱՆԻՖ-ի շուրջ ծագած կոռուպցիոն սկանդալներից հետո։

Հիշեցնենք, որ օգոստոսի 15-ին Գլխավոր դատախազությունը հանրային քրեական հետապնդում էր հարուցել Դավիթ Փափազյանի նկատմամբ, որը 2019-2024 թվականներին զբաղեցրել է «Հայաստանի պետական հետաքրքրությունների ֆոնդ» ՓԲԸ-ի տնօրենի պաշտոնը։

Փափազյանը մեղադրվում է ՀՀ Քրեական օրենսգրքի երեք՝ առանձնապես խոշոր չափերով փողերի լվացման, փաստաթղթերի կեղծման և պաշտոնեական լիազորությունների չարաշահման հոդվածներով։

Դավիթ Փափազյանի նկատմամբ հարուցված քրեական հետապնդումը կապված է ԱՆԻՖ-ի դուստր ընկերության՝ «Ձեռնարկատեր+պետության հակաճգնաժամային ներդրումների ֆոնդ» ՓԲԸ-ի կողմից «Սի էֆ դաբլյու» ՓԲԸ-ում կատարած ներդրման հետ։

Այս գործով մեղադրանքներ են առաջադրվել նաև «Ձեռնարկատեր+պետության հակաճգնաժամային ներդրումների ֆոնդ» ՓԲԸ-ի նախկին տնօրեն Բելլա Մանուկյանի և «Սի էֆ դաբլյու» ՓԲԸ-ի տնօրեն Կարինե Անդրեասյանի նկատմամբ։

«Չի հաջողվելու մեզ մեղավոր կարգել` իր և իր կառավարության խայտառակ սխալների և թերությունների համար, որոնք խափանեցին ԱՆԻՖ-ի հիմնադիր թիմի մշակած ծրագրերից մի քանիսը»,- գրել է Փափազյանը։

Դավիթ Փափազյանի նկատմամբ հայտարարված է միջազգային հետախուզում։