ՀՀԿ խոսնակ Էդուարդ Շարմազանովը հայտարարել է, թե Սերժ Սարգսյանի նախագահության օրոք «Հայաստանը դուրս եկավ մեկուսացվածությունից և կարողացավ լուրջ օրակարգ ձևավորել տարածաշրջանում»:

«ՉԻ» - Այսինքն, ըստ Էդուարդ Շարմազանովի, Ռոբերտ Քոչարյանի նախագահության տարիներին Հայաստանը միջազգային մեկուսացման մեջ էր: Իրականում, իհարկե, այդպես էլ կար, բայց ինչ-որ չենք հիշում, որ այն տարիներին պրն Շարմազանովը կամ որևէ այլ հանրապետական բարձրաձայն խոսեր այդ մասին: Նրանք, որպես կանոն, հիացմունք էին արտահայտում Հայաստանի «հաղթողական» քաղաքականության առթիվ:

Ինչ վերաբերում է «տարածաշրջանում լուրջ օրակարգ ձևավորելուն», ապա Սերժ Սարգսյանն իսկապես այդ ուղղությամբ ինչ-որ քայլեր ձեռնարկել է: Այլ հարց է, որ մարդկանց գործունեությունը գնահատվում է ոչ թե «հարցեր բարձրացնելու», այլ դրանք լուծելու կարողությամբ:

Հետաքրքիր է` երեք տարվա ընթացքում ի՞նչ հարց է լուծել Սերժ Սարգսյանը, եթե հայ-թուրքական գործընթացը ձախողված է, սահմանն առաջվա պես փակ է, ազատագրված տարածքներն էլ միջազգային փաստաթղթերում նշվում են որպես «օկուպացված»: Թե՞ կարևորն, այնուամենայնիվ, «օրակարգ ձևավորելն» է: