Տեսանյութեր
Լուսանկարներ
Ակցիա Կառավարության շենքի դիմաց. պատերազմի մասնակիցները վերադարձրին իրենց մեդալները
Այսօր՝ հոկտեմբերի 2-ին, 44-օրյա պատերազմի մի շարք մասնակիցներ բողոքի ակցիա էին իրականացնում Կառավարության շենքի դիմաց։ Նրանք, ի նշան բողոքի, հրաժարվեցին իրենց ստացած գերատեսչական մեդալներից։
«Մենք չենք կարող այս շքանշանները կրել այն պարագայում, երբ ամեն արժեք, ամեն գաղափար, ամեն զոհողություն, որ դրված էր այս շքանշանների հիմքում, զրոյացվել է»,- ասաց ակցիայի մասնակիցներից Արման Պետրոսյանը։
Ակցիայի մասնակիցներից Հովսեփ Ղազարյանի խոսքով՝ Հայաստանի իշխանությունները 2020-ի նոյեմբերի 9-ից հետո անընդհատ զիջումների են գնացել, և որպեսզի ցույց տան իշխանությունների վարած քաղաքականության նկատմամբ անհամաձայնությունը, նրանք որոշել են նման ակցիա իրականացնել։
«Ամենացավալին այն է, որ սկսեցին հրաժարվել մեր ինքնությունից, ազատությունից և պայքարելու իրավունքից։ Դրա պատճառով է, որ այսօր իմ մարտական ընկերների հետ եկել ենք բողոքի ձայն բարձրացնելու։ Մեր մեդալները և շքանշանները վերադարձնելու միջոցով ուզում ենք ասել, որ այս իշխանությունը զբաղված է ապազգային և ապահայկական գործունեությամբ»,- ասաց Ղազարյանը։
Ակցիայի վերջում նրանք Կառավարության շենքի դիմաց դրեցին իրենց այս տարիների ընթացքում ստացած բոլոր մեդալները, շքանշանները և հեռացան։
Մեկնաբանություններ (2)
Մեկնաբանել