Կապանում քաղաքապետի ընտրությունն ընդառաջ Սյունիքի մարզպետ Սուրիկ Խաչատրյանն ու Զանգեզուրի պղնձամոլիբդենային կոմբինատի՝ ԶՊՄԿ-ի տնօրեն Մաքսիմ Հակոբյանը մարզկենտրոն Կապանում՝ մարզպետարանում, ժողով են արել քիչ թե շատ ակտիվ անձանց ու գործարարների մասնակցությամբ և հայտարարել, որ ՀՀԿ-ն Կապանի քաղաքապետի ընտրությունում թեկնածու է առաջադրել («Հայփոստ» ՊՓԲԸ Կապանի փոստային մասնաճյուղի տնօրեն, 41-ամյա Աշոտ Հայրապետյան), և 2008-ից քաղաքապետ Արտուր Աթայանն այլևս անելիք չունի:

Մարդկանց, սակայն, ավելի շատ զայրացրել է ոչ թե պետական շենքը՝ մարզպետարանը, կուսակցական շահին ծառայեցնելու փաստը, այլ այն, որ գորիսեցին (մարզպետը) և քաջարանցին (գործարարը) նստել-որոշել են, թե Կապանում ով անելիք ունի կամ չունի, և ով պիտի քաղաքը ղեկավարի:

Նրանք հայտարարում են, որ Արտուր Աթայանը կապանցիների սրտով է, և միայն մարզպետագործարարական այս հարկադրանքը բավական է, որ քաղաքի բնակիչները ձայն տան հենց Արտուր Աթայանին:

Սեպտեմբերի 9-ին կայանալիք Կապանի քաղաքապետի ընտրություններում առաջադրվել է երեք թեկնածու՝ Արտուր Աթայանը, Աշոտ Հայրապետյանը և Գագիկ Աթաջանյանը: