Պաղեստինյան ՀԱՄԱՍ շարժումը պատասխանել է Գազայի հատվածում խաղաղ կարգավորման ԱՄՆ նախագահ Դոնալդ Թրամփի առաջարկին։ Այդ մասին հայտնում են Reuters-ը, Axios-ի լրագրող Բարաք Ռավիդը և կատարական Al Jazeera հեռուստաընկերությունը։

Վերջիններիս տվյալներով՝ ՀԱՄԱՍ-ի ղեկավար կազմը համաձայնել է.

• ազատ արձակել իսրայելցի կենդանի բոլոր պատանդներին և զոհվածների մարմինները հանձնել Թրամփի պայմաններին համապատասխան,
• անմիջապես բանակցություններ սկսել միջնորդների միջոցով՝ ծրագրի մանրամասները քննարկելու համար,
• Գազայի հատվածի կառավարումը հանձնել Պաղեստինյան կոմիտեին:

«Մենք գնահատում ենք պատերազմը դադարեցնելու ուղղությամբ նախագահ Թրամփի ջանքերը»,- ՀԱՄԱՍ-ի հայտարարությունը մեջբերել է Axios-ի լրագրողը։

Հայտարարության մեջ նաև նշվում է, որ մյուս հարցերը «լուծվելու են պաղեստինյան համապարփակ ազգային կառույցի շրջանակներում, որին մասնակցելու և իր պատասխանատու ներդրումն է ունենալու ՀԱՄԱՍ-ը»:

ԱՄՆ-ն սեպտեմբերի 29-ին հրապարակել էր Իսրայելի և ՀԱՄԱՍ-ի միջև պատերազմը դադարեցնելու Դոնալդ Թրամփի ծրագիրը: Այն նախատեսում է Գազայի հատվածում արտաքին կառավարման ժամանակավոր ներդրում, իսրայելական զորքերի փուլային դուրսբերում, իսրայելցի պատանդների և պաղեստինցի բանտարկյալների ազատ արձակում:

Իսրայելը և մյուսները երկրներ գրեթե անմիջապես իրենց աջակցությունը հայտնեցին այս ծրագրին: ՀԱՄԱՍ-ը մինչ օրս չէր հայտնել իր դիրքորոշման մասին։  Ավելի վաղ՝ հոկտեմբերի 3-ին, Թրամփը, պաղեստինյան այս շարժման լռության ֆոնին, մինչև այս շաբաթվա վերջ վերջնաժամկետ էր տվել Գազայի հատվածում գործարք կնքելու համար:

Լուսանկարը՝ ABC News-ից