Գյումրիում զանգվածային անկարգություններին մասնակցելու, պաշտոնատար անձի օրինական ծառայողական կամ քաղաքական գործունեությանը միջամտելու և արդարադատության իրականացմանը կամ գործի քննությանը միջամտելու հատկանիշներով նախաձեռնված քրեական վարույթի նախաքննության շրջանակներում համայնքապետարանի շենքում կատարվում են քննչական գործողություններ: Այս մասին «Հետք»-ին փոխանցեց Քննչական կոմիտեի մամուլի խոսնակ Կիմա Ավդալյանը։

Նշենք՝ երբ իրավապահ մարմինների ներկայացուցիչները համայնքի ղեկավարին ձերբակալելու գործողություններ են իրականացրել, համայնքապետարանի դիմաց հավաքվել են նրա կողմնակիցներն ու բողոքի ակցիա իրականացրել: Վարդան Ղուկասյանին սատարել են նաև համայնքապետարանի աշխատակիցները։ Բախումներ են եղել իրավապահ մարմինների ու քաղաքացիների միջև։

Հիշեցնենք՝ 2025թ. հոկտեմբերի 20-ին Հակակոռուպցիոն կոմիտեն հաղորդագրություն էր տարածել այն մասին, որ Կոմիտեի օպերատիվ-հետախուզական վարչության ձեռնարկած մեծածավալ օպերատիվ-հետախուզական միջոցառումների և գաղտնի քննչական գործողությունների արդյունքում փաստական տվյալներ են ստացվել Գյումրու համայնքի ղեկավարի և գլխավոր ճարտարապետի կողմից նախնական համաձայնությամբ կաշառք-գումարներ պահանջելու և ստանալու դեպքերի վերաբերյալ։

Նախաձեռնված քրեական վարույթի շրջանակներում ութ անձանց, ներառյալ՝ համայնքի ղեկավարի նկատմամբ, կայացվել են հանրային քրեական հետապնդումներ հարուցելու և ձերբակալելու մասին որոշումներ։

Հակակոռուպցիոն դատարանը՝ դատավոր Վարդգես Սարգսյանի նախագահությամբ, այսօր որոշեց 2 ամսով կալանավորել Գյումրի համայնքի ղեկավար Վարդան Ղուկասյանին:

Կասեցվել են Վարդան Ղուկասյանի լիազորությունները։

Լուսանկարը՝ Գյումրու համայնքապետարանի էջից