Բյուրեղավան համայնքի ղեկավար Հակոբ Բալասյանը հայտարարություն է տարածել, որ իր պաշտոնավարման կասեցման վերաբերյալ քննիչի որոշման մասին տեղեկացել է լրատվամիջոցներից։ 

«Այդ մասին որևէ կերպ իրազեկված չեմ եղել, մինչդեռ, նման պայմաններում կարող էր առաջանալ մի վիճակ, որ համայնքի ղեկավարը լիազորությունները կասեցված վիճակում կայացներ համայնքային նշանակության որոշումներ։

Այսպիսով, վարույթն իրականացնող մարմինն անտեսել է ոչ միայն իմ, այլև համայնքի հազարավոր բնակիչների շահերը»,- «Ֆեյսբուք» սոցիալական ցանցի իր էջում գրել է համայնքի ղեկավարը։

Ըստ նրա՝ երկու տարի առաջ հարուցված քրեական գործի շրջանակներում, ենթադրաբար,  հարցաքննվել են հարյուրավոր քաղաքացիներ, իրեն առաջադրվել է ակնհայտ անհիմն մեղադրանք, որը չի ընդունել։

«Դատարանը կորոշի՝ մեղավո՞ր եմ, թե ոչ։ Մեր համայնքում բոլորը գիտեն` ով ով է` իր ապրածով և արած գործերով։ Մի քանի չկողմնորոշված, անդեմ անձինք ամեն ինչ անում են մեր միասնությունը և քաղաքի անդորրը խանգարելու համար։ Իրենք չեն հաջողելու։ Հետագայում կներկայացնեմ մանրամասներ` կոնկրետ անուններով»,-հայտարարել է համայնքի ղեկավարը։

Հիշեցնենք, «Հետք»-ի հարցմանն ի պատասխան՝ Հակակոռուպցիոն կոմիտեն 2025թ. հոկտեմբերի 29-ին հայտնել էր, որ քրեական վարույթի շրջանակում մեղադրանք է ներկայացվել Բյուրեղավան համայնքի ղեկավարին՝ 9 դրվագով պաշտոնեական լիազորությունները չարաշահելու համար (ՀՀ նախկին քրեական օրենսգրքի 308-րդ հոդվածի 1-ի մաս): 

Քրեական վարույթն առնչվում է ձևական աճուրդների միջոցով հողերի ապօրինի օտարմանը: Կոմիտեից նաև հայտնել էին, որ համայնքապետի նկատմամբ խափանման միջոց են ընտրվել բացակայելու արգելքն ու պաշտոնավարման կասեցումը։

Լուսանկարը՝ Վիքիպեդիայի