«Սթրեսի իմունիզացիայի լավագույն միջոցն առողջ ապրելակերպն է, ճիշտ կազմակերպված հանգիստը և ճիշտ սնվելու կերպը: Սթրեսներն անխուսափելի են: Պարզապես հարցն այն է, թե մենք ինչպես ենք հաղթահարում դրանք»,- մեզ հետ զրույցում ասաց Երևանի բժշկական համալսարանի և կառավարման ակադեմիայի հոգեբանության բաժնի դասախոս, INTRA հոգեբանական կենտրոնի հոգեբան Խաչատուր Գասպարյանը:

Սթրեսները կյանքի համար վտանգավոր մի շարք հիվանդությունների սկզբնաղբյուր են: Մեկնաբանելով այսօր փողոցներում մենախոսելով կամ ինչ-որ անհայտ մեկին հայհոյող մարդկանց հոգեվիճակը՝ Խաչատուր Գասպարյանն ասաց, որ այդ երևույթը միշտ էլ եղել է, ուղղակի ավելի ակնառու է դարձել:

«Կան որոշ մարդիկ, ովքեր չեն կարողանում թաքցնել իրենց մտքերը, զայրույթը: Դա չի կարելի դիտել որպես հոգեկան խանգարում: Ուրիշ ֆենոմեն կա աշխարհում. մարդիկ բջջային հեռախոսով իրենք իրենց այնպես են խոսում, որ կարծես թե իրականում խոսում են: 1-2 անգամ ինքս ականատես եմ եղել նման իրողության, երբ կարծես թե մարդը խոսում է հեռախոսով, բայց հանկարծ այդ պահին զանգ է գալիս այդ նույն հեռախոսին: Սակայն դրանով ևս չի կարելի չափել ամբողջ հասարակությունը: Յուրաքանչյուրի մոտ դա կարող է դրսևորվել յուրովի: Մեկի մոտ այդ երևույթը կարող է ուժեղ մտքի դրսևորման արդյունք լինել, մյուսի մոտ սեփական հոգեվիճակը չթաքցնելու, երրորդի մոտ մեկ այլ պատճառ»,- ասաց հոգեբանը:

Դիանա Բախշյան