Վարչապետ Նիկոլ Փաշինյանը մասնակցել է «Հայաստանը և խաղաղությունը ռիսկերի ու հնարավորությունների խաչմերուկում» խորագրով լիագումար քննարկմանը, որը տեղի է ունեցել Միջազգային և անվտանգության հարցերի հայկական ինստիտուտի XV անվտանգային ֆորումի շրջանակում: Այս մասին հաղորդում է Կառավարության մամուլի ծառայությունը։

Միջոցառմանը մասնակցել են նաև օրենսդիր, գործադիր մարմինների ներկայացուցիչներ, դիվանագետներ, հասարակական, քաղաքական գործիչներ, փորձագետներ և այլք:

Որպես բանախոս՝ քննարկմանը մասնակցել են նաև Հայաստանի Հանրապետությունում ԱՄՆ արտակարգ և լիազոր դեսպան Քրիստինա Քվինը և Հայաստանում Եվրոպական միության առաքելության ղեկավար, դեսպան Վասիլիս Մարագոսը:

Մինչ քննարկումը, վարչապետ Նիկոլ Փաշինյանը հանդես է եկել ներածական խոսքով, անդրադարձել ժամանակակից մարտահրավերներին։ Վարչապետը նշել է, որ Հայաստանի շուրջ անվտանգային միջավայրն ավելի կայուն չի եղել իր գոյության ամբողջ ընթացքում: Երկրի ղեկավարի խոսքով, Հայաստանի շուրջ անվտանգության ու կայունության միջավայրի ստեղծման հարցում դեր ունեն նախորդած բոլոր պրոցեսները, ընդհուպ մինչև՝ նախորդ օրը TRIPP նախագծի իրագործմանն ուղղված Հայաստանի և ԱՄՆ կառավարությունների կողմից տարածված հայտարարությունը: Վարչապետի դիտարկմամբ՝ այս ամենը մեծ հնարավորություններ է բացում նաև տարածաշրջանի համար:

Խոսելով աշխարհում տիրող իրավիճակի մասին՝ Նիկոլ Փաշինյանն ընդգծել է. «Ըստ էության, աշխարհը փոթորկվում է: Իսկ Հայաստանի Հանրապետությունը և մեր տարածաշրջանն այսօր քայլ-քայլ, առնվազն՝ Հայաստան-Ադրբեջան հարթությունում վերածվում է կայունության ու անվտանգության մի միջավայրի, համագործակցության մի միջավայրի, որը չափազանց կարևոր է և շատ մեծ ձեռքբերում է»: Այս պրոցեսների իրականացման հարցում երկրի ղեկավարը բարձր է գնահատել Եվրոպական քաղաքական համայնքի, ինչպես նաև ԱՄՆ նախագահ Դոնալդ Թրամփի անձնական ներդրումը:

Վարչապետի խոսքով, այս պրոցեսների տրամաբանական շարունակությունը կլինի նաև Հայաստան-Թուրքիա հարաբերությունների զարգացումը. «Մենք հույս ունենք, որ այն պրոցեսները, որոնք տրամաբանորեն և քաղաքական երկխոսության մակարդակով լուծվել են, դրանք նաև գետնի վրա կունենան իրենց արտահայտությունը»:

Եվս մեկ անգամ ընդգծելով, որ Հայաստանի և ԱՄՆ կառավարությունների հայտարարությունը շատ կարևոր անկյունաքար է Հայաստանի և Ադրբեջանի միջև հաստատված խաղաղությունն ինստիտուցիոնալ դարձնելու ճանապարհին՝ Նիկոլ Փաշինյանը նշել է. «Մենք առաջ ենք ընթանում շատ ավելի մեծ տեմպերով, քան ի սկզբանե կարող էինք ենթադրել, որովհետև երբ Վաշինգտոնի Հռչակագրում արձանագրում էինք տարածաշրջանի կապուղիների բացումը Հայաստանի Հանրապետության համար, այդ թվում՝ Ադրբեջանի հիմնական մասի և Նախջևանի Ինքնավար Հանրապետության միջև կապի ապահովումը՝ Հայաստանի Հանրապետության համար փոխադարձ առավելություններով, մենք ենթադրում էինք, որ Հայաստանը պիտի երկաթուղային կապ ստանա արտաքին աշխարհի հետ: Եվ դա տեղի ունեցավ, կարծում եմ, շատ ավելի վաղ, քան Հայաստանը և միջազգային հանրությունն սպասում էին: Այսօր արդեն Հայաստան-Ադրբեջան երկկողմ առևտրի դրսևորումները տեղի ունեցան շատ ավելի վաղ, քան Հայաստանը և միջազգային հանրությունն սպասում էին, գուցե՝ նաև Ադրբեջանը»:

Ամփոփելով խոսքը՝ վարչապետը ևս մեկ անգամ շնորհակալություն է հայտնել միջազգային գործընկերներին՝ այսօրվա հանգրվանին հասնելու գործում ցուցաբերած աջակցության համար:

Հաջորդիվ տեղի է ունեցել քննարկում դիվերսիֆիկացման, դիմակայունության, ապաշրջափակման նորաբաց հնարավորությունների ու մարտահրավերների շուրջ, բանախոսները պատասխանել են թեմայի շրջանակում հնչեցրած հարցերին: