ՀՀ փոխվարչապետ, տարածքային կառավարման նախարար Արմեն Գևորգյանն այսօր այցելեց Արմավիրի մարզ՝ նոր ուսումնական տարվա նախաշեմին ծանոթանալու առաջնահերթ խնդիրների լուծման ծրագրով իրականացվող դպրոցների վերանորոգման աշխատանքների ընթացքին:

Ծրագրի երեք փուլով Արմավիրի մարզին հատկացվել է 3,9 մլրդ դրամ: Հիմնական միջոցներն ուղղվել են մարզի համայնքներում դպրոցների շենքերի վերանորոգմանը: Ընդհանուր առմամբ ծրագրում ընդգրկված է մարզի շուրջ 40 դպրոց, ընդ որում՝ որոշ դպրոցների շենքերի նորոգումն ավարտին հասցնելու համար գումարներ են հատկացվել ծրագրի բոլոր երեք փուլով:

Աշխատանքները կատարվում են՝ ըստ սահմանված ժամանակացույցի: Մարզի մի շարք համայնքներում աշակերտները նոր ուսումնական տարին կդիմավորեն բարեկարգ դպրոցներում:

Փոխվարչապետը մարզպետ Ա. Ղահրամանյանի ուղեկցությամբ նախ եղավ Մրգաստան համայնքի դպրոցում, որի վերանորոգման համար ծրագրի երրորդ փուլով հատկացվել է 31,7 մլն դրամ: Այստեղ աշխատանքներն առաջիկա օրերին ամբողջությամբ կավարտվեն:

Արտիմետ համայնքում դպրոցի նորոգման աշխատանքներն արդեն ավարտվել են, և այն պատրաստ է նոր ուսումնական տարվան: Առաջնահերթ խնդիրների լուծման ծրագրի երկրորդ փուլով այդ նպատակով հատկացվել էր 47,5 մլն դրամ:

Հուշակերտ համայնքի դպրոցում ծրագրի երկրորդ փուլով հատկացված 38,5 մլն դրամով կառուցվում է կաթսայատուն, ու տեղադրվում է ջեռուցման համակարգ: Աշխատանքները շարունակվում են և ըստ պատասխանատուների՝ չեն կարող խանգարել ուսումնական գործընթացին:

Ծրագրի երեք փուլով շուրջ 160 մլն դրամ էր հատկացվել Լուկաշին համայնքի դպրոցի վթարային մասնաշենքի ամրացման և վերանորոգման համար: Ծրագրով նախատեսված աշխատանքները մոտենում են ավարտին, սակայն շենքի նորոգումն ամբողջապես ավարտին հասցնելու համար լրացուցիչ միջոցներ կպահանջվեն: Ա. Գևորգյանը տեղում պատասխանատուների հետ քննարկեց հետագա աշխատանքների շարունակման հնարավորությունները:

Փոխվարչապետն այցելեց նաև Խանջյան համայնք, որի վթարային դպրոցի շենքի ամրացման համար պետբյուջեից հատկացվել է ընդհանուր առմամբ 217 մլն դրամ: Աշխատանքներն արդեն ավարտվում են, և նոր ուսումնական տարին աշակերտները կսկսեն հիմնանորոգված դպրոցում՝ թողնելով մանկապարտեզի շենքը:

Ա. Գևորգյանը պատասխանատուներին հորդորեց ուշադրություն դարձնել աշխատանքների որակին, իսկ այն դպրոցներում, որտեղ վերանորոգման աշխատանքները շարունակվում են, դրանք կազմակերպել այնպես, որ չխանգարեն ուսումնական գործընթացին:

Համայնքներում փոխվարչապետը հանդիպեց նաև դպրոցների կոլեկտիվների և բնակիչների հետ, լսեց նրանց հուզող խնդիրները: Մասնավորապես, մանկավարժները բարձրացրին դրույքաչափը շաբաթական 22-ից 18-ժամյա դարձնելու հարցը: Ա. Գևորգյանը տեղեկացրեց, որ կրթության և գիտության ու ֆինանսների նախարարությունները ուսումնասիրում են խնդիրը, և արդյունքում համապատասխան որոշումներ կկայացվեն:

Խանջյան համայնքում մտահոգություն հնչեց, որ նոր վերանորոգված դպրոցի մոտով անցնող հեղեղատարը կարող է վնասել շենքը: Փոխվարչապետը նշեց, որ քաղաքաշինության նախարարությանը կհանձնարարվի լուծել խնդիրը: Այս մասին հայտնում է տարածքային կառավարման նախարարությունը: