Այսօր արտակարգ իրավիճակների նախարարի տեղակալ Հայկարամ Մխիթարյանն ընդունեց Ասիական զարգացման բանկի (ԱԶԲ) պատվիրակությանը։ Հանդիպմանը ներկա էին ԱԶԲ Հայաստանյան ներկայացուցիչ Դեյվիդ Դոլը, բանկի գլխամասի տարածաշրջանային գլխավոր տնտեսագետ Լիազիզա Սաբիրովան և խորհրդատու, աղետային ռիսկերի կառավարման մասնագետ Նեյլ Բրիթոնը։

Ներկայում Ասիական զարգացման բանկը մշակում է Հայաստանի հետ համագործակցության հնգամյա ռազմավարություն, որի համար ճշտվում են տարբեր գերատեսչությունների առաջնահերթությունները։

«Մենք գիտենք, որ Հայաստանը խոցելի է տարբեր աղետների առումով, և այդ նպատակով մասնագետ ենք հրավիրել, որը կօգնի գնահատել իրավիճակը»,- ասաց Դեյվիդ Դոլը։

Նեյլ Բրիթոնը նշեց, թե տեղյակ է, որ Հայաստանը վերջերս ընդունել է աղետների ռիսկի նվազեցման (ԱՌՆ) ազգային ռազմավարություն, և իրենք կուզենային իմանալ, թե որոնք են Հայաստանի առաջնահերթությունները։

Խոսելով ԱԻՆ կառուցվածքի ու գործունեության վերաբերյալ՝ նշվեց, որ մեր աշխատանքի հիմնական ուղղություններն են սեյսմիկ պաշտպանությունը, ճգնաժամային կառավարումը, վաղ ազդարարումը և աղետների մոնիթորինգը։

ՍՊԱԾ գործակալության պետը ներկայացրեց իրենց աշխատանքի գերակա ուղղությունները՝ սեյսմիկ վտանգի գնահատում, բնակչության ուսուցում, շենք-շինությունների սեյսմակայունության գնահատում և բարձրացում։

Դեյվիդ Դոլը հայտնեց, որ հայկական կողմի բարձրացված խնդիրները համահունչ են բանկի ծրագրերին և առավել մանրամասն ուսումնասիրությունից հետո կարող են ընդգրկվել իրենց նախագծերում։

Այցի ավարտին հյուրերը եղան նաև ԱԻՆ ճգնաժամային կառավարման կենտրոնում՝ ծանոթանալով դրա առաքելությանն ու տեխնիկական զինվածությանը։