Սեպտեմբերի 9-ին Ախթալայում կայանալիք ՏԻՄ ընտրություններում քաղաքապետի պաշտոնի համար առաջադրվել է 2 հանրապետական թեկնածու: Գործող քաղաքապետ Հայկազ Խաչիկյանին առաջադրել է Հանրապետական կուսակցության գործադիր մարմինը: Իսկ Ախթալայի նախկին քաղաքապետ Սուրեն Թամազյանն  ինքնաառաջադրմամբ է դարձել թեկնածու: Վերջինս դժգոհեց Հանրապետական կուսակցությունից իր թեկնածությունը չպաշտպանելու համար. «Ես 20 տարվա կուսակցական եմ, ինքն էլ (նկատի ունի Հայկազ Խաչիկյանին-հեղ.) հենց որոշեց, որ քաղաքապետ պետք է դառնա, ընդունվեց այդ կուսակցություն»,- ասաց նա:    

Ախթալայի հրապարակում մեր հարցումները ցույց տվեցին, որ համայնքի   բնակիչները գոհ են գործող քաղաքապետի աշխատանքից. «Վերջին 4 տարիներին Ախթալան անճանաչելիորեն փոխվել է: Հայկազի կատարած աշխատանքները շատ են:  Մինչև Հայկազի քաղաքապետ ընտրվելը մեր քաղաքի աղբարկղերի կողքով անցնել չէր լինում, հիմա լրիվ մաքուր է: Ես կուզենամ Հայկազ Խաչիկյանն ընտրվի քաղաքապետ»,- ասաց բուժքույր Անուշ Ավետյանը: Ախթալացիներ Սուսաննա Գալստյանը, Անուշ Բեգջանյանը, 85-ամյա կենսաթոշակառուներ Սավա Դավիդովը,   Հմայակ Օհանյանը, Վահան Խասիկյանը և Մարտիրոս Թամազյանը նույնպես գոհ էին Խաչիկյանի աշխատանքից:

Խաչիկյանի թեկնածությանը դեմ են Ախթալայի այն բնակիչները, ովքեր կապ ունեն Ախթալայի լեռնահարստացման կոմբինատի սեփականատեր Սերոբ Տեր-Պողոսյանի հետ: «Հիմա Սերոբի թիմը իրենց խանգարում է, իրար հետ լարվածություն ունեն: Այն ժամանակ իրենք Սերոբին օգտագործեցին իմ դեմ: Հիմա ինձ հետ սերոբականները սովորական են»,- ասում է Սուրեն Թամազյանը: Փաստենք, որ լեռնահարստացման կոմբինատի (ԼՀԿ) անվտանգության ծառության պետ Արսեն Չիթչյանի (մականունը` Բոդոլ) ղեկավարությամբ Սերոբ Տեր-Պողոսյանի համախոհները հիմա աշխատում են Ս. Թամազյանի օգտին: 

Հայկազ Խաչիկյանը չհերքեց, որ 2008թ. քաղաքապետ է ընտրվել նաև Սերոբ Տեր-Պողոսյանի աջակցությամբ, սակայն Տեր-Պողոսյանի  հետ նրանց «ջուրը  մի առվով չի հոսել»: Քաղաքապետ ընտրվելուց մեկ ամիս անց Տեր-Պողոսյանը նորընտիր քաղաքապետից պահանջել է իր անունով սեփականաշնորհել Ախթալայի զբոսայգու տարածքը, ֆուտբոլի դաշտը, լողավազանը և քաղաքի վարչական տարածքում գտնվող  հեռուստաաշտարակի շենքը: Խաչիկյանը մերժել է. «Դրանք  պետք է վերանորոգվեն և ծառայեն Ախթալայի բնակչությանը»,- պատասխանել է նա:   

Վերջինս ասաց, որ Ս. Տեր-Պողոսյանի մանկապղծության արարքները նկատել է  2009-2010 թթ., երբ «Նևա-Ռուս» ընկերությունը գնել է «Մեթըլ Փրինս»-ի բաժնետոմսերի 80 տոկոսը և դրա համար 40 մլն դրամ է փոխանցել Տեր-Պողոսյանին: «Նկատեցի, որ Սերոբը մի տեսակ հակվածություն ունի դեպի տղաները»,- ասաց   քաղաքապետը: Տեր-Պողոսյանն էլ քաղաքապետի վարքագծում է իր նկատմամբ անվստահություն նկատել. «Այդ ժամանակ էլ նա ինձ ասաց. եթե կռիվ եք ուզում, մենք կկռվենք: Այդ պահից էլ մեր ու Սերոբի կռիվը սկսվեց»,-ասաց Հայկազ Խաչիկյանը:   Այդ կռիվը Տեր-Պողոսյանի ձերբակալվելուց հետո Հայկազ Խաչիկյանի դեմ շարունակում է Բոդոլը, ով Ախթալայի ենթաշրջանի հեղինակություններին իր ազդեցության շրջանակում պահելու համար օգտագործում է կոմբինատի սեփականատիրոջ փողերը: Ինքը` Արսեն Չիթչյանը, 90,000 դոլար արժողությամբ BMV X 5 մակնիշի ավտոմենքենա է վարում: 

Հայկազ Խաչիկյանը «Հետքին» ներկայացրեց իր պաշտոնավարման 4 տարիներին Ախթալայում կատարված աշխատանքները: Նա ասաց, որ մինչ իր քաղաքապետ ընտրվելը Ախթալայի համայնքի բյուջեի սեփական եկամուտների հավաքագրումը կազմել է 6,3 մլն դրամ: Նորընտիր քաղաքապետը սեփական եկամուտների   հավաքագրման տարեկան 1մլն դրամ աճ է արձանագրել: 2012թ. համայնքի բյուջեի  սեփական եկամուտների հավաքագրումը կազմել է 13 մլն դրամ: Համայնքի 2012թ. բյուջեի եկամուտների մուտքերը կազմել են 42 մլն դրամ: Հայկազ Խաչիկյանը   հայտնեց, որ իր պաշտոնավարման 4 տարիներին «Մեթըլ Փրինս»-ից կանոնավոր կերպով տարեկան գանձվել  է 1,5 մլն դրամ բնապահպանական վճար: Նախկինում քաղաքում կար ընդամենը երկու լուսատու, իր պաշտոնավարման ընթացքում տեղադրվել է 70 լուսատու քաղաքի Բարիտ, Սվինեց, Սարահարթ և Առափնյա թաղամասերում: Քաղաքում տեղադրվել է 45 աղբարկղ, ցանցապատվել է գերեզմանոցը,  գազիֆիկացվել է Բարիտ թաղամասը, վերանորոգվել են Ախթալայի 2 մանկապարտեզները, քաղաք գնացող ճանապարհի 2 կամուրջները: Երեխաների համար խաղահրապարակ է կառուցվել, վերջին 2 տարիներին վերանորոգվել են քաղաքի 11 շենքերի տանիքները, օգոստոսի վերջեին կսկսվի ևս 2 շենքի տանիքների վերանորոգումը: «Իմ պաշտոնավարման 4 տարիներին ես 420 մլն դրամի կապիտալ  շինարարություն եմ իրականացրել, որը 10 անգամ ավելի է, քան  համայնքի տարեկան  բյուջեն»,- ասաց Հայկազ Խաչիկյանը: 

Սուրեն Թամազյան	Հայկազ Խաչիկյան

Վերջինս հայտնեց, որ քաղաքապետի թեկնածու Սուրեն Թամազյանը համայնքի բյուջեին պարտք է մոտ 1,5 մլն դրամ: Շուկայականից թանկ գնով ավտոմեքենա գնելու համար 2010թ. Լոռու մարզի առաջին ատյանի դատարանը վճռել է, որ Սուրեն Թամազյանը որպես վնասի փոխհատուցում պետք է համայնքի բյուջեին 1մլն 185 հազար դրամ վճարի: Նախկին քաղաքապետը դեռևս բյուջեին չի վճարել դատարանի վճռով սահմանված վնասի փոխհատուցումը: Սուրեն Թամազյանը և նրա ընտանիքի անդամները համայնքի բյուջեի նկատմամբ նաև 300 հազար դրամի հարկային պարտավորություն ունեն: Պարտքերի առնչությամբ «Հետքը» խնդրեց քաղաքապետի թեկնածուի մեկնաբանությունը. «Ես սխալվել առել եմ էդ մեքենան, դու էլ մեքենան կծախեիր, փողը նպատակային կօգտագործեիր: Ինչու՞ ես մինչև օրս քշում էդ մեքենան, բարոյական տղա»,- Խաչիկյանին հարցն ուղղելով՝ պատասխանեց Ս. Թամազյանը: Իր ընտանիքի անդամների հարկային պարտավորությունների կապակցությամբ էլ Թամազյանն ասաց. «Հնարավոր է՝ ունենանք: Փող կունենանք, կտանք»: 

Վերջինս էլ Հայկազ Խաչիկյանին մեղադրեց, թե վերանորոգված շենքերի հին թիթեղները տեղափոխել է իրենց ընտանիքին պատկանող ջերմոց: Դրա հետ կապված՝ Հայկազ Խաչիկյանը մեկնաբանեց. «Նախ՝ մենք ջերմոց չունենք, երկրորդ՝ կարելի է հանձնաժողովով ստուգել, թե մեր տարածքում թիթեղ կա՞, թե՞ ոչ»: Հակազ Խաչիկյանը ներկայացրեց Սուրեն Թամազյանի պաշտոնավարման տարիներին տեղի ունեցած այլ օրինախախտումներ. «570 քմ տարածք է 575 դոլարով սեփականացրել Ախթալայի հրապարակին հարող շենքում, 74,000 դրամով 83քմ տարածք է սեփականացրել քաղաքի Աբովյան 19 շենքի առաջին բացվածքում, նույն շենքի 210 քմ բացվածքն էլ 132,000 դրամով է սեփականացրել: