Հանրապետության նախագահ Վահագն Խաչատուրյանը հանդիպում է ունեցել պաշտոնական այցով Հայաստան ժամանած ԱՄՆ փոխնախագահ Ջեյ Դի Վենսի հետ։ Այս մասին տեղեկանում ենք նախագահի պաշտոնական կայքէջից։

«Նախագահը ողջունել է փոխնախագահի այցը՝ ընդգծելով, որ այն արտացոլում է Հայաստանի և Միացյալ Նահանգների միջև հարաբերությունների բարձր մակարդակը։

Հանդիպման ընթացքում Հանրապետության նախագահը կարևորել է տարածաշրջանում խաղաղության հաստատման փաստը, որում մեծ ավանդ ունի ԱՄՆ նախագահ Թրամփը: Շեշտվել է, նաև, որ բարձրաստիճան փոխայցելությունները նպաստում են համագործակցության ընդլայնմանը և երկկողմ հարաբերությունների հետագա ամրապնդմանը»,- նշվում է հաղորդագրության մեջ։

Հիշեցնենք՝ Ամերիկայի Միացյալ Նահանգների փոխնախագահ Ջեյ Դի Վենսը տիկնոջ՝ Ուշա Վենսի հետ փետրվարի 9-10-ին պաշտոնական այցով կլինի Հայաստանի Հանրապետությունում։ Վենսը վարչապետ Փաշինյանի հետ առանձնազրույց է ունեցել, ինչից հետո կողմերը շարունակել են քննարկումն ընդլայնված կազմով։ Հանդիպումից հետո նրանք երկկողմ փաստաթուղթ են ստորագրել և հանդես եկել հայտարարություններով։