ՀՀ ոստիկանության Շիրակի մարզի վարչության պետ Կարեն Բաբակեխյանը հայտարարել է, որ Գյումրիի քաղաքապետ Վարդան Ղուկասյանի որդին՝ հետախուզման մեջ գտնվող Սպարտակ Ղուկասյանը, հատել է ՀՀ սահմանը եւ արդեն արտասահմանում է:

Այդ ինչպե՞ս է ստացվել, որ նրա նկատմամբ քրեական գործը հարուցվել է Գյումրիում տեղի ունեցած կրակոցների հետ կապված, որը տեղի է ունեցել օգոստոսի 24-ի լույս 25-ի գիշերը, բայց իրավապահները կրակոցների մասին «իմացել են» միայն օգոստոսի 28-ին՝ «ՀԺ»-ում տպված տեղեկատվությունից:

Այսինքն՝ Սպարտակ Ղուկասյանը 3-4 օր ունեցել է Հայաստանից հանգիստ, առանց շտապելու հեռանալու համար:

Դժվար է հավատալ, որ իրավապահները չեն իմացել, որ հանրապետության երկրորդ քաղաքի կենտրոնում կրակել են: Ավելի հավանական է, որ լավ էլ իմացել են, բայց «ժամանակ են տվել», որ Սպարտակ Ղուկասյանը հեռանա, եւ դրանից հետո են սկսել ակտիվ գործողություններ՝ «գործը բացահայտելու» ուղղությամբ: