Պաշտպանության նախարարության նախկին պաշտոնյա Հայկազ Բաղմանյանը, կինը՝ Նարինե Ադամյանը, որդին՝ Պավել Բաղմանյանը, հարսը՝ Արմինե Ղահրամանյանը և փոխկապակցված Զարա Ադիյանը 2026թ. մարտի 3-ին հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն:

Հայկազ Բաղմանյանին պատկանող գույքի առնչությամբ իրականացվում է ուսումնասիրություն, որի արդյունքում կազմվել է ուսումնասիրության արդյունքների նախնական ամփոփագիր: Նշված անձինք հրավիրվում են վարչություն՝ ծանոթանալու ուսումնասիրության արդյունքներով հավաքված նյութերին և ստացված տվյալների առնչությամբ դիրքորոշում ներկայացնելու:

Զարա Ադիյանը ընտանիքի անդամ չէ, սակայն որոշ գույքերի իրական շահառու է:

Հայկազ Բաղմանյանի նկատմամբ նախաձեռնված է քրեական վարույթ: Նա մեղադրվում է ապօրինի ձեռնարկատիրական գործունեության և փողերի լվացման մեջ: Հակակոռուպցիոն կոմիտեն 2025թ. սեպտեմբերի 4-ին հաղորդագրություն էր տարածել, որ 1999-2020 թվականների ընթացքում Հայկազ Բաղմանյանը զբաղեցնելով Պաշտպանության նախարարության 5-րդ բանակային կորպուսի հրամանատարի, Զինված ուժերի գլխավոր շտաբի պետի տեղակալի և Հավաքական անվտանգության պայմանագրի կազմակերպության միացյալ շտաբի պետի տեղակալի պաշտոնները, օրենքով նախատեսված արգելքին հակառակ, իր մտերիմի՝ առևտրային կազմակերպության տնօրենի օժանդակությամբ մասնակցել է այդ ընկերության կառավարմանը: Ընկերությունում փաստացի ունեցել է 25 տոկոս բաժնեմաս, որը ձևակերպված է եղել Բաղմանյանի անվամբ:

Նախաքննությամբ պարզվել է, որ 2011-2018 թվականներին առևտրային կազմակերպությունը ստացել է ավելի քան 1 մլրդ դրամի շահույթ, որի՝ Հայկազ Բաղմանյանի փաստացի պատկանող 25 տոկոս մասնաբաժինը կազմել է 251 մլն դրամ: Ավելին՝ առանձին դեպքերում նշված կազմակերպության գործընկեր՝ Շվեդիայի Թագավորությունում գրանցված ընկերությունը մատակարարման դիմաց վճարումներն ամբողջությամբ կատարել է Հ. Բաղմանյանի անձնական հաշվեհամարին: 

Նշենք, որ այս փուլում Գլխավոր դատախազությունը չի հանրայնացնում, թե որ գույքերն են հանդիսացել ուսումնասիրության առարկա: Պատճառաբանում են, որ շահագրգիռ անձինք ծանոթանալով գործի նյութերին, կարող են ներկայացնել ապացույցներ, դիրքորոշումներ, ինչը հնարավոր է փոփոխություն առաջացնի ենթադրյալ ապօրինի գույքի ցանկում: Այդ նպատակով էլ ցանկը չեն հրապարակում:

Լուսանկարում՝ Հայկազ Բաղմանյանը (արխիվային)