ՀՀ Ազգային անվտանգության խորհրդի նիստում Սերժ Սարգսյանն անդրադարձել է ադրբեջանցի մարդասպան Ռամիլ Սաֆարովին ազատ արձակելու թեմային ու հայտարարել, թե հատուկ հանձնարարություն ունի տալու ԱԱԾ տնօրեն Գորիկ Հակոբյանին:

«ՉԻ» - Չհասկացանք, հիմա Գորիկ Հակոբյանը պիտի բանուգործը թողած «թիթեռ նկարի՞»: Առանց այն էլ մարդը քունուդադար չունի, «Զվարթնոց» օդանավակայանում ինը ամսական տեռորիստներից կազմված ահաբեկչական հանցախմբեր է բացահայտում ու արտաքսում Թուրքիա՝ դրանով իսկ ապահովելով մեր ազգային անվտանգությունը:

Ուրիշ բան, եթե ադրբեջանցի այդ մարդասպանը պատահաբար հայտնվի «Զվարթնոցում»: Այ, այդ դեպքում մեր հատուկ ծառայություններն արժանի հակահարված կհասցնեն ոսոխին (այսինքն՝ ունեցած-չունեցածը ձեռքից կառնեն ու կարտաքսեն երկրից):

Ինչ վերաբերում է Հունգարիայի կառավարությանը, որն ադրբեջանցի մարդասպանին սիրով հանձնել է Ադրբեջանին, ապա ճիշտ կլինի, եթե Էդուարդ Նալբանդյանն իր հունգարացի գործընկերոջից խռովի: Միևնույն է՝ ուրիշ բանի ընդունակ չէ: