Ես՝ Լիլյա Ալեքսանյանս, 19.07.2006թվ. Իրանի քաղաքացիներ Սիմոն Անդունիի, Սիմոնյան Ղարղանիի, Սամիկ Բուղաչյանի, Վարուժ Մինասյանի հետ Արաբկիր համայնքի Գր.Արծրունի փողոցի 8 հարկանի շենքում բնակարան ձեռք բերելու համար կնքեցի նախնական պայմանագիր և այդ պահին էլ վճարեցի բնակարանի գումարը ամբողջությամբ:

25.11.08 թվ. Իրանի քաղաքացիները (վերը նշված) հրավիրում են «ժողով»՝ համատիրություն ստեղծելու նպատակով: Ինձ չեն տեղեկացնում «ժողովի» մասին: Խախտում են «Համատիրությունների մասին» ՀՀ օրենքով սահմանված կարգով շենքի բոլոր բնակարանների սեփականատերերի պարտադիր մասնակցությունը:

Քանի որ բնակարանների մեծամասնությունը դեռ չէր վաճառվել, այսինքն՝ իրենցն էր, իսկ ինձ և եղած սեփականատերերին էլ չէին տեղեկացրել, Իրանի մի քանի քաղաքացիներով ստեղծում են «Նոր Ջուղա» համատիրությունը:

23.03.2008 թվ. «Նոր Ջուղա» համատիրությունը հրավիրում է «ժողով», որի մասին նորից ինձ չեն տեղեկացնում, նշանակում է 11500 դրամ վարձավճար:

30.03.2008 թվ. «Նոր Ջուղա» համատիրության նախագահ Մհեր Տեր-Գրիգորյանը ինձ գրությամբ տեղեկացնում է, որ 1.04.2008 թվ. Գր.Արծրունի 78/3 շ. «Նոր Ջուղա» համատիրությունը և համատիրության վարչությունը յուրաքանչյուր բնակարանի համար սպասարկման վարձ է նշանակում ամսական 11500 դրամ, և օգոստոսին կկայանա «ժողով», որտեղ կքննարկվեն տարեկան բյուջեն և ծախսերը:

Այսինքն՝ շենքի վարչությունը նշանակում է կամայական գին, որից հետո նոր օգոստոսին պետք է քննարկեն տարեկան բյուջեն և ծախսերը: Օգոստոսին կայանալիք «ժողովին» ինձ նորից չեն հրավիրում: Խախտելով օրենքը, չունենալով «Նոր Ջուղա» համատիրության հետ կնքած պայմանագիր, անտեսելով իմ՝ սեփականատիրոջ իրավունքները՝ կայացրել են «որոշումներ», որոնք մի քանի հոգու կամայական ցանկություններն են:

Այսպես ես հայտնվեցի, անկախ իմ կամքից, Իրանի քաղաքացիների բիզնես ծրագրում:

28.11.11թվ. «Նոր Ջուղա» համատիրությունը, դիմելով առաջին ատյանի Արաբկիր և Քանաքեռ-Զեյթուն դատարան, ինձանից 345000 դրամի բռնագանձման պահանջ է ներկայացրել:

24.07.12 թվ. դատարանը պարզեց, որ (ամսական վարձ՝ յուրաքանչյուր բնակարանի համար 11500 դրամի չափով) խախտել են «Բազմաբնակարան շենքի կառավարման մասին» ՀՀ օրենքի 10-րդ հոդվածի 4-րդ կետը, համաձայն որի՝ վճարի չափը սահմանվում է՝ ելնելով շենքի բաժնային սեփականության մեջ նրա բաժնի չափից:

Դատարանը համարում է, որ դրսևորելով կամայականություն, խախտելով վերը նշված օրենքը՝ հայցն անհիմն է և ենթակա է մերժման, քանի որ օրենքի խախտմամբ պարտադիր նորմի գումարների սահմանումը չի կարող դիտվել իրավաչափ:

Ես միշտ պատրաստ եմ եղել վճարելու ՀՀ-ում գործող պետական սակագներով, սակայն «Նոր Ջուղա» համատիրության նախագահ Ժենո Պարսամյանի բիզնես ծրագրում դա չնչին գումար է համարվում: Տարեկան վճարում եմ իմ գույքահարկը:

Որպեսզի Ժենո Պարսամյանը իր բիզնեսից չզրկվի, 2012թվ. նամակով ինձ ժողովի է հրավիրում, որը կկայանա օգոստոսի 26-ին՝ ժամը 18-ին: Նամակի մեջ՝ գրություն, որտեղ 60 ԱՄՆ դոլար է պահանջում՝ բացի ամսական 11500 դրամից: Սա վկայում է Ժենո Պարսամյանի կողմից գումար կորզելու անհագ ցանկության մասին:

Ներկա լինելով «ժողովին»՝ ականատես եղա, որ 64-ից ներկա էր 12 սեփականատեր, մնացած մարդիկ անծանոթ էին, խնդրեցի ներկա-բացակա անել, բայց չարեցին: Մեծ դժվարությամբ նկարեցի մի քանի կադր, որպեսզի պարզ լինի, որ «ժողով» չի կայացել, քանի որ նույնիսկ դրսից եկած մարդկանց խումբը սեփականատերերի հետ միասին քվեն չապահովեց:

Ժողովին ճանաչեցի Տիգրան Դավթյանին, նրա կնոջը՝ Իրենին, աղջկան, որոնցից ոչ մեկն էլ չունի ոչ լիազորագիր, ոչ էլ սեփականատերեր էին: Որպես գլխաքանակ գուցե կային 2-3 լիազորագրեր, որոնք հանձնվել էին լրիվ անծանոթ մարդկանց: Լիազորագրերը պետք է վերլուծեր ու ստուգեր տվողի տվյալները, այն մարդկանց անձնագրերը, որոնք ներկա էին: Մի խոսքով, դա «ժողով» չէր, այլ ֆարս էր: Նկարելով «ժողովին» ներկա գտնվողներին՝ ես դուրս եկա:

Տիկին Ժենիկը ցանկանում էր յուրաքանչյուր բնակարանի քառակուսի մետրի գումարը սահմանել 160 դրամ, իսկ ՀՀ-ում բազմաբնակարան շենքի գումարը քառակուսի մետրի դիմաց 8-15 դրամ է: Այդ ինչպե՞ս է, որ այդ գումարը այլ շենքերի տանիքների, վերելակի սպասարկման, մաքրությանը բավարարում է, իսկ նորակառույց շենքին, որտեղ բնակվում է բնակիչների 20 տոկոսը, քանի որ նրանք Իրանի քաղաքացիներ են, չի բավարարում:

Նշեմ նորակառույց շենքեր, որոնք անգամ համատիրություն չունեն. Վ. Համբարձումյան 71շ.75 H, 14/4շ., Ավետիսյան 112շ., Արաբկիր 21փ. 10շ., Աղբուր Սերոբ 6/2 շ.:

Իսկ Գր.Արծրունի 78/3 շ. իր 64 բնակարանի սեփականատերով պահում է կառավարիչ, նախագահ, վարչության 3 անդամ, պահակ, հաշվապահ, տնտեսվար, որոնք միայն աշխատավարձ և պարգևատրում են ստանում, բայց հարկայինում գրանցված չեն:

Մնում է միայն պարզել՝ քվեն չապահոված Ժենո Պարսամյանը իր սրտի ցանկությամբ նշանակած քառ. մետրի դիմաց 160 դրամը կորզելո՞ւ է բնակիչներից, թե՞ ոչ:

Լիլյա Ալեքսանյան