Այսօր ձերբակալվել են Խաչատուր Աբովյանի անվան հայկական պետական մանկավարժական համալսարանի պրոռեկտոր Մարիամ Իսպիրյանը, վերջինիս որդին ու շախմատիստ Սմբատ Լպուտյանը։ Վերջիններս ձերբակալվել են որպես համալսարանի աշխատակիցներ:

Հակակոռուպցիոն կոմիտեի մամուլի խոսնակ Մարինա Օհանջանյանը «Հետքի» հետ զրույցում հաստատեց, որ համալսարանի երեք աշխատակիցներ ձերբակալվել են, սակայն անուններ չասաց:

«Հակակոռուպցիոն կոմիտեում նախաձեռնված քրեական վարույթի շրջանակում ծառայողական լիազորությունները չարաշահելու, խարդախության, դրան օժանդակելու և պաշտոնեական  կեղծիք կատարելու մեղադրանքներով ձերբակալվել են Հայկական պետական մանկավարժական համալսարանի պրոռեկտորը և մի շարք այլ աշխատակիցներ»,- ասաց Մ. Օհանջանյանը:

Հիշեցնենք, որ Հակակոռուպցիոն կոմիտեի կողմից իրականացվող մեկ այլ քրեական վարույթի շրջանակներում 2025թ. հոկտեմբերի 17-ին ձերբակալվել էին Խաչատուր Աբովյանի անվան հայկական պետական մանկավարժական համալսարանի ռեկտոր Սրբուհի Գևորգյանը և պրոռեկտորներից մեկը։ Նրանց մեղադրանք է առաջադրվել։