Ռուսաստանը և Ուկրաինան մեկ ամսվա մեջ երկրորդ անգամ փոխանակվել են ռազմագերիներով։ Կողմերը միմյանց փոխանցել են 193 ռազմագերի։

Փոխանակմանը նպաստել են Արաբական Միացյալ Էմիրությունները և ԱՄՆ-ն։ Ռուսաստանցի զինվորականները դեռևս գտնվում են Բելառուսի տարածքում, որտեղ նրանց ցուցաբերվում է հոգեբանական և բժշկական օգնություն։ Այնուհետ նրանց կտեղափոխեն Ռուսաստան։

Ուկրաինայի նախագահ Վլադիմիր Զելենսկին հայտարարել է, որ բոլոր նրանք, որոնք վերադարձել են Ուկրաինա, այդ երկրի զինված ուժերի, Ազգային գվարդիայի և Ազգային ոստիկանության ներկայացուցիչներ են։

Երկու շաբաթ առաջ՝ ապրիլի 11-ին, երբ ուղղափառ եկեղեցին հաջորդ օրը նշելու էր Զատիկը, Մոսկվան և Կիևը «175-ը 175-ի դիմաց» փոխանակվել էին ռազմագերիներով։ Այդ ժամանակ Ռուսաստան էին վերադարձել Կուրսկի մարզի բնակիչների վերջին խումբը՝ 5 կին և 2 տղամարդ, որոնք Ուկրաինայում էին հայտնվել այդ երկրի զինված ուժերի հարձակումից հետո։

Լուսանկարը՝ Ուկրաինայի նախագահի ֆեյսբուքյան էջից