Ֆինանսների նախարարությունը հանրային քննարկման է ներկայացրել «Հարկային օրենսգրքում» փոփոխություններ կատարելու մասին օրենքի նախագիծ, որով առջարկվում է ընդլայնել սոցիալական ծախսերի շրջանակը։ Առաջարկվում է 2027թ․ հունվարի 1-ից սոցիա­լա­կան ծախս դիտարկել նաև ոչ առևտ­րա­յին կազ­մա­­­կեր­պու­թյուն­ներին և զանգ­վա­ծային լրատ­վու­­թյան միջոց­ներին հայտա­րա­րատու ֆիզիկական անձանց կողմից փոխանցված դրամա­կան միջոցները: Կազմակերպությունների և ԶԼՄ-ների շրջանակը սահ­մանելու է Կառա­վա­րությունը։

Ըստ հեղինակների՝ կարգավորման նպատակը ֆիզի­կա­կան անձանց վճարած եկամտային հարկի հաշվին ոչ առևտ­րա­­յին կազ­մա­­­կերպու­թյուն­ներին և զանգ­վա­ծային լրատ­վու­թյան միջոց­ներին հատ­կա­ցում­ներ կատարելու կառուցա­կար­գերի ձևավո­րումն է։

Հայաստանում գործում է ռեզիդենտ ՀՀ քաղա­քա­ցի­ների (բացա­ռությամբ անչափահասների) եկամուտների հայտարարագրման և դրան զուգա­հեռ` «սոցիալական ծախ­սերի» համակարգ: Հայտարարատուները հնա­րա­վո­րություն ունեն իրենց վճարած եկամտային հարկի գումարներից հետ ստանալ տարվա ընթաց­քում իրենց կամ ընտանիքի անդամների համար կատարված ու փաստաթղթերով հիմ­նա­վորված առողջապա­հու­թյան և կրթության ծառայությունների գծով ծախսերի մի մասը:

«Ոչ առևտրային կազմակերպությունների և զանգ­վածային լրատ­վու­թյան միջոցների կայուն ու շարունակական գործունեությունը կարևոր նշանակություն ունի անկախ քաղա­քացիական հասարա­կու­թյան ու ազատ, անկողմնակալ խոսքի զարգացման քաղա­­քականության տեսանկյունից»,-նշված է նախագծում։

Նախագծի ընդունման դեպքում սոցիալական ծախսեր են համարվելու հարկային տարվա ընթացքում ֆիզիկական անձի կողմից (այդ թվում՝ հարկային գոր­ծակալի միջոցով) իր և իր ընտանիքի անդամների համար կատարված՝ առող­ջա­պա­հու­թյան, կրթության, բնակարանային ապահովության գծով ծախսերը, ինչպես նաև ֆիզիկական անձի կողմից ոչ առևտրային կազ­մա­­­կերպություններին կամ զանգ­վա­ծային լրատ­վու­թյան միջոց­ներին անհատույց փոխանցված դրամական միջոց­ները: