Թերթի տեղեկություններով՝ շաբաթներ առաջ մարդկանց տներն օրհնելու նպատակով քահանաներ եւ աբեղաներ են ուղարկվել Արմավիրի մարզի մի շարք գյուղեր: Յուրաքանչյուր գյուղին բաժին է ընկել մեկ հոգեւորական: Եվ ահա Կողբավան գյուղում Սմբատ աբեղա Պողոսյանը տնօրհնեքի արարողությունից հետո հրավիրվել է գյուղապետի տուն՝ ճաշելու: Սեղանի շուրջ նրանք մտերմիկ զրույցի են բռնվել, որից հետո աբեղան «բռնկվել է», սկսել վիրավորել գյուղապետին, քաշքշել ու հայհոյել նրա ընտանիքի անդամներին: Թերթը փորձել է վեճը սկսելու պատճառները պարզել գյուղապետ Հովհաննես Քոչարյանից, ով ասել է. «Որ իմանայի, կասեի: Ուղղակի թեթեւ խոսակցություն է եղել, երեւի ճիշտ չհասկացանք իրար»: 

Այս միջադեպին արձագանքել է Հայ առաքելական եկեղեցին եւ պատժել աբեղային: «Տվյալ հոգեւորականը տեղի ունեցածի պատճառով արդեն կարգալույծ է արվել»,- թերթին տեղեկացրել է Մայր Աթոռի մամլո դիվանի տեղեկատվական կենտրոնի տնօրեն տեր Վահրամ քահանա Մելիքյանը: