Մարդու իրավունքների եվրոպական դատարանը (ՄԻԵԴ) 2026 թվականի հունիսի 11-ի վճռով արձանագրել է Եվրոպական կոնվենցիայի 5-րդ հոդվածի 1-ին կետի (անձի ազատության և անձեռնմխելիության իրավունք) խախտում «Աշղյանն ու Պողոսյանն ընդդեմ Հայաստանի» գործերով (գանգատներ N 5293/16 և 5295/16)՝ գտնելով, որ դիմումատուներին ազատությունից զրկելը եղել է ոչ իրավաչափ։

Գործը վերաբերում է 2015 թվականի հունիսի 23-ին «Էլեկտրիկ Երևան» խաղաղ բողոքի ակցիայի ընթացքում ոստիկանության կողմից բերման ենթարկված երկու քաղաքացիների՝ Աբրահամ Աշղյանին և Նարինե Պողոսյանին։ Վերջիններս զրկվել էին ազատությունից՝ առանց որևէ հանցանք կատարելու հիմնավոր կասկածի առկայության։ ՄԻԵԴ-ը վերահաստատել է, որ Կոնվենցիայի 5-րդ հոդվածը պահանջում է, որպեսզի ցանկացած ազատությունից զրկման դեպք զերծ լինի կամայականությունից և խստորեն համապատասխանի օրենքի տառին։

Հղում անելով իր նախադեպային իրավունքին (մասնավորապես՝ «Իշխանյանն ընդդեմ Հայաստանի» գործին)՝ Դատարանը եզրակացրել է, որ դիմումատուների ձերբակալությունները չեն հիմնվել «հիմնավոր կասկածի» վրա, ինչը Կոնվենցիայի 5-րդ հոդվածի պահանջների հիմնական նախապայմանն է։

ՄԻԵԴ-ը պարտավորեցրել է Հայաստանի Հանրապետությանը յուրաքանչյուր դիմումատուի վճարել․

–2,000 եվրո՝ ոչ նյութական (բարոյական) վնասի փոխհատուցման համար,

–250 եվրո՝ դատական և այլ ծախսերի փոխհատուցման նպատակով։

լուսանկարը՝ Ներկա Ալեքսանյանի/ 26.06. 2015 թ․