Իսրայելի արտաքին գործերի նախարար Գիդեոն Սաարը հայտարարել է, որ կառավարության առաջիկա նիստի ժամանակ նա կներկայացնի բանաձև, որը կոչ է անում Իսրայելին ճանաչել Հայոց ցեղասպանությունը։ Ինչպես հայտնում է Ynet-ը, այս հայտարարությանը նախորդել է ԱՄՆ նախագահ Դոնալդ Թրամփի հայտարարությունն այն մասին, որ Թուրքիայի նախագահ Ռեջեփ Թայիփ Էրդողանն իր ընկերն է, քանի որ «զերծ մնաց Իրանի հետ հակամարտությանը միջամտելուց» և խոստացավ, որ Իսրայելի ու Թուրքիայի միջև առճակատում չի լինի։ Բանաձևի առաջ քաշման մասին Իսրայելի արտաքին գործերի նախարարը գրառում է արել նաև X-ի իր միկրոբլոգում։

I will bring before the Israeli government at its next meeting a proposed resolution for the official recognition by the Government of Israel of the Armenian Genocide.

Recognizing the genocide perpetrated against the Armenian people in the final years of the Ottoman Empire is…

— Gideon Sa'ar | גדעון סער (@gidonsaar) June 25, 2026

Բանաձևի նախագծում նշվում է, որ «ելնելով բարոյական և պատմական պարտքից՝ Իսրայելը ճանաչում է Օսմանյան կայսրության վերջին շրջանում հայ ժողովրդի դեմ իրագործված ցեղասպանությունը»: Բանաձևը նշում է, որ Իսրայելը պետք է դատապարտի այդ իրադարձությունների վերաբերյալ պատմական ճշմարտության ժխտումը, նսեմացումը կամ խեղաթյուրումը:

Բանաձևին կից բացատրական գրության մեջ ասվում է, որ Հայոց ցեղասպանությունը սկսվել է 1915 թվականի ապրիլին՝ Կոստանդնուպոլսում հարյուրավոր հայ մտավորականների, առաջնորդների և կրթված գործիչների ձերբակալությամբ, տեղահանմամբ և սպանությամբ: «Դրանից հետո օսմանյան կառավարությունը սկսեց հայ բնակչության համակարգված ոչնչացումը»,- ընդգծված է փաստաթղթում։ Փաստաթղթում նաև նշվում է, որ 32 երկրներ տարբեր ձևերով ճանաչել են Հայոց ցեղասպանությունը, և Իսրայելը «պետք է դա անի բարոյական և պատմական պարտքի լույսի ներքո»:

Հայոց ցեղասպանության ճանաչման հարցը բազմիցս քննարկվել է Իսրայելում, սակայն մինչ օրս այն չի դարձել երկրի կառավարության պաշտոնական դիրքորոշումը։ 2016 թվականին Իսրայելի խորհրդարանի՝ Կնեսետի կրթության հանձնաժողովը, հանդես եկավ Հայոց ցեղասպանությունը ճանաչելու հայտարարությամբ։ 2018 թվականի մայիսին, Իսրայելի և Թուրքիայի միջև հարաբերությունների սրման պայմաններում, Կնեսետի լիագումար նիստը հավանություն տվեց Հայոց ցեղասպանության ճանաչման հարցը քննարկման և քվեարկության դնելուն։ Այդուհանդերձ, Իսրայելի կառավարությունը մինչ օրս պաշտոնապես չի ճանաչել Հայոց ցեղասպանությունը։

Լուսանկարը՝ Aleksey Chalabyan a.k.a Xelgen/Wikimedia Commons