Օրվա վերջին Ազգային ժողովը 96 կողմ եւ 1 դեմ ձայների հարաբերակցությամբ ընդունեց 2004թ. փետրվարին Բուդապեշտում ՆԱՏՕ-ի դասընթացների ժամանակ հայ սպա Գուրգեն Մարգարյանին սպանած հանցագործին Հունգարիայի իշխանությունների կողմից Ադրբեջանին փոխանցելու եւ Ադրբեջանի նախագահի կողմից վերջինիս ներում շնորհելու կապակցությամբ հայտարարությունը:

Միակ դեմ քվեարկողը «Ժառանգություն» խմբակցության պատգամավոր Զարուհի Փոստանջյանն էր: Մինչեւ քվեարկությունը ընդդիմադիր պատգամավորը հայտարարել էր, որ դեմ է քվեարկելու, քանի որ իր առաջարկությունները չեն ընդունվել: ՀԱԿ-ն ու ՀՅԴ-ն կողմ են քվեարկել հայտարարությանը:

Ամփոփիչ ելույթում Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը նախ իր գոհունակությունը հայտնեց պատգամավորներին, որ կարողացան միասնական եւ ակտիվ ջանքերով հասնել դատապարտող հայտարարության ընդունմանը: Նա ավելացրեց, որ Ազգայն ժողովի հայտարարության վերջնական տեսքը շատ քիչ է փոփոխության ենթարկվել:

Ըստ այդմ, Ազգային ժողովը հայտարարում է`

1. Հունգարիայի իշխանությունը նույնպես պատասխանատվություն է կրում կատարվածի համար, հետեւաբար Հայաստանի Հանրապետության Ազգային ժողովը դատապարտում է Հունգարիայի իշխանությունների դրսեւորած վարքագիծը եւ կասեցնում է  Հունգարիայի Հանրապետության խորհրդարանի հետ պաշտոնական հարաբերությունները.

2. Ադրբեջանը այս քայլով հերթական անգամ վտանգում է տարածաշրջանային անվտանգությունը եւ էլ ավելի է խորացնում իր սանձազերծած  հակահայկական թշնամանքի եւ ատելության մթնոլորտը, ոտնահարում է միջազգային իրավական փաստաթղթերով երաշխավորված մարդու իրավունքները,   կրկին ի ցույց է դնում Լեռնային Ղարաբաղի հիմնախնդրի խաղաղ կարգավորման բանակցային գործընթացը վիժեցնելու եւ դրանում միջազգային հանրության, մասնավորապես` ԵԱՀԿ Մինսկի խմբի համանախագահների կատարած աշխատանքը ձախողելու իր հետեւողական քաղաքականությունը.

3. Ադրբեջանում պետական մակարդակով հայերի հանդեպ արմատավորված ատելության մթնոլորտը վերահաստատում է այն իրողությունը, որ Լեռնային Ղարաբաղի Հանրապետությունը որեւէ կարգավիճակով չի կարող լինել Ադրբեջանի կազմում.

4. Հորդորում է ժողովրդավարական արժեքներով առաջնորդվող բոլոր երկրների խորհրդարաններին դատապարտել Հունգարիայի եւ Ադրբեջանի միջեւ 2012 թվականի օգոստոսի 31-ին իրականացված գործարքը.

5. Ակնկալում է միջազգային խորհրդարանական կազմակերպությունների  համարժեք արձագանքը եւ համապատասխան հստակ գործողությունները: