Մարդասպան Ռամիլ Սաֆարովին Ադրբեջանին արտահանձնելու Հունգարիայի կայացրած որոշումից հետո երեկ ՀՀ Ազգային ժողովը հայտարարություն ընդունեց, որ «դատապարտում է Հունգարիայի իշխանությունների դրսևորած վարքագիծը և կասեցնում է Հունգարիայի Հանրապետության խորհրդարանի հետ պաշտոնական հարաբերությունները»:

Ի՞նչ են մտածում ազատամարտիկները: «Սասուն» ջոկատի հրամանատար Սասուն Միքայելյանը «Ժողովուրդ»-ի հեւտ զրույցում ասաց, որ Ադրբեջանն իր այդ հանդուգն քայլով ցույց տվեց ողջ աշխարհին, որ հաշվի չի առնում միջազգային հանրության կարծիքը:

«Սա նշանակում է, որ Ադրբեջանը ցանկացած պահի կարող է պատերազմ հրահել՝ առանց հետևանքների մասին մտածելու: Մենք պետք է ազգովի գիտակցենք, որ պատերազմի վտանգն ամեն պահի կա: Վաղը, մյուս օրը, թե մեկ-երկու տարի հետո Ադրբեջանը կսանձազերծի պատերազմ:

Բանակցությունների միջոցով այլևս որևէ արդյունքի հնարավոր չէ հասնել: Ես կարծում եմ՝ Հայաստանը ոչ թե պետք է ճանաչի Արցախի անկախությունը, այլ ժողովրդի կամքի արտահայտմամբ՝ հանրաքվեի միջոցով, երկու երկրների խորհրդարանները որոշում ընդունեն Հայաստանն ու Արցախը միասնական հանրապետություն հռչակելու մասին:

Սա պետքո է լինի մեր առաջին քայլը, որովհետև արդեն հասկանալի է, որ Ադրբեջանը երբ ցանկանա, պատրաստ է պատերազմ հայտարարել՝ հաշվի չառնելով միջազգային հանրության կարծիքը:

Իսկ մենք, մի կողմ դնելով մեր ամբիցիաները, պետք է համախմբվենք և պատրաստ լինենք դիմակայելու Ադրբեջանի կուտակած զինուժին ու ֆինանսական մեծ հնարավորություններին: Չպետք է հույս կապենք եվրոպական կառույցների կամ արտաքին այլ ուժերի հետ. մեր հույսը մեր միասնականությունը պիտի լինի»: