Հակակոռուպցիոն դատարանում Արտյոմ և Արամ Խաչատրյանների վերաբերյալ  քննվող քրեական գործով դատարանն այսօր՝ 2026թ. հուլիսի 2-ին բավարարել է դատախազի ներկայացրած միջնորդությունները և վերջիններիս նկատմամբ որպես խափանման միջոց է կիրառել կալանքը։ Նրանց նկատմամբ կիրառված 200 մլն դրամ գրավը դարձել է պետության եկամուտ։ Այս մասին «Հետքին» տեղեկացրին Գլխավոր դատախազությունից։

Ըստ մեղադրանքի՝ Արտյոմ Խաչատրյանը, լինելով Պետական եկամուտների կոմիտեի նախկին նախագահ Գագիկ Խաչատրյանի որդին, եղբոր՝ Գուրգեն Խաչատրյանի, հորեղբորորդու՝ Արամ Խաչատրյանի և Ալեքսանդր Եսայանի մասնակցությամբ հիմնադրել է «Այյունեթվորքս» ՍՊԸ-ն, որը հարկային և մաքսային մարմիններին ապրանքներ մատակարարելու և տեղեկատվական տեխնոլոգիաների ոլորտում ծառայություններ է մատուցել։ Ընկերության բաժնեմասերի մի մասը ձևակերպվել է նրանց ազգականի՝ Հայկ Խաչատրյանի անունով։

Մեղադրանքի համաձայն՝ 2008-2016 թվականներին Գագիկ Խաչատրյանը, օգտագործելով իր պաշտոնեական դիրքը, հանձնարարել է ՊԵԿ-ի և հետագայում Ֆինանսների նախարարության պաշտոնատար անձանց աջակցել «Այյունեթվորքս» ՍՊԸ-ին՝ գնումների գործընթացներում առավել նպաստավոր պայմաններ ստեղծելու, անհրաժեշտ տեղեկատվություն տրամադրելու, խոչընդոտները վերացնելու և ընկերության մասնակցությունն ապահովելու համար։ Քննության տվյալներով՝ այդ պայմանների շնորհիվ «Այյունեթվորքս» ՍՊԸ-ն 2008-2020թթ. ՊԵԿ-ի հետ կնքել է ապրանքների մատակարարման և ծառայությունների մատուցման պայմանագրեր՝ ընդհանուր 4 մլրդ 426 մլն դրամ արժեքով, որոնց շրջանակում ընկերությանը վճարվել է ավելի քան 4 մլրդ 88 մլն դրամ։

Ըստ մեղադրանքի՝ Արտյոմ, Գուրգեն և Արամ Խաչատրյանները, հիմնադրելով ընկերությունը և օգտվելով Գագիկ Խաչատրյանի ստեղծած ապօրինի բարենպաստ պայմաններից, օժանդակել են պաշտոնեական լիազորությունների չարաշահմանը։ Քննության վարկածով՝ դրա հետևանքով վնասվել է պետական մարմինների հեղինակությունը, խաթարվել են ՊԵԿ-ի և Ֆինանսների նախարարության բնականոն գործունեությունն ու պետական գնումների գործընթացը, ինչպես նաև խախտվել են մրցույթներին մասնակցող այլ կազմակերպությունների իրավունքներն ու օրինական շահերը։

Լուսանկարում՝ Արտյոմ Խաչատրյանը