Այսօր վաղ առավոտից իրավապահները խուզարկում են ԱԺ նախկին պատգամավոր, գործարար Գագիկ Ծառուկյանի առանձնատանը: Այս մասին Ֆեյսբուքի իր էջում հայտնել է նրա մամուլի խոսնակ, ԱԺ նախկին պատգամավոր Իվետա Տոնոյանը:

Քիչ անց Տոնոյանը հանդես է եկել նոր հայտարարությամբ՝ հայտնելով, որ գործողությունների աշխարհագրությունն ավելի մեծ է: «Այս պահին լայնածավալ խուզարկություններ են իրականացվում «Մուլտի Գրուպ» կոնցեռնի կազմում ընդգրկված գրեթե բոլոր ընկերություններում, ինչպես նաև այդ կազմակերպությունների տնօրենների բնակարաններում»,- գրել է Իվետա Տոնոյանը:

«Հետքի» տեղեկություններով՝ քննչական գործողություններն իրականացվում են փողերի լվացման քրեական վարույթով։

Քննչական կոմիտեից մանրամասներ չեն հայտնում։ ՔԿ մամուլի քարտուղար Կիմա Ավդալյանի փոխանցմամբ՝ քրեական վարույթի շրջանակում կատարվում են անհրաժեշտ քննչական և վարութային գործողություններ և ավելի ուշ պաշտոնական հաղորդագրություն կտարածեն։

Թարմացված՝ 13:14-ի դրությամբ․

Քննչական կոմիտեից հայտնում են, որ կոմիտեում քննվող մեկ տասնյակից ավելի քրեական վարույթների շրջանակում 70-ից ավելի հասցեներում կատարվում են միաժամանակյա խուզարկություններ։

Թարմացված` 19:40-ի դրությամբ.

Մոտ 12 ժամ է, ինչ խուզարկվում է Գագիկ Ծառուկյանի տունը։ Քննիչները դեռ չեն ավարտել խուզարկությունը, ու հայտնի չէ, թե այն երբ կավարտվի։