Գյումրու «Հաղթանակի» զբոսայգու 6890 քմ տարածքի բարեկարգման համար կծախսվի 172 մլն դրամ։ Տարիներով անտեսված այգու վերականգնման նախագիծը նախնական հաշվարկների համեմատ կրկնակի թանկացել է, հատկացված գումարը բավարարելու է այգու միայն մեկ հատվածը բարեկարգելուն:  

Գյումրու «Հաղթանակի» զբոսայգին 600 մետր երկարությամբ և 27,56 մետր լայնությամբ՝ ընդհանուր 16536 քմ մակերեսով կանաչ տարածք է, որի վերականգնման ու բարեկարգման վերաբերյալ բազմիցս է բարձրաձայնվել, սակայն քաղաքի այլ՝ առավել հրատապ խնդիրների լուծման ֆոնին մշտապես մղվել է հետին պլան: Այգին սկիզբ է առնում Տերյան փողոցից և հասնում մինչև Բագրատունյաց պուրակ: 1900-ականների սկզբներին այգու տեղը ձորակ է եղել, որը կոչել են «ուռումի յաբու», քանի որ մերձակա տարածքներում հույներ են ապրել, նաև՝ եզդիներ: 

Երկրորդ համաշխարհային պատերազմից հետո՝ 1946-1947 թվականներին, որոշում է կայացվել տարածքը փակել և այգի հիմնել՝ նվիրված Հայրենական պատերազմում զոհված լենինականցիների հիշատակին: Որքան որ զոհ է ունեցել քաղաքը, այդքան էլ ծառ է տնկվել: Ըստ պաշտոնական տվյալների և Գյումրու վետերանների միության կողմից ստեղվծած «Մատյան անմահության» գրքում առկա արձանագրության՝ 1941-1945թթ․-ին պատերազմում զոհվել է 13074 լենինականցի: Ասում են, որ այգում ծառերը տնկել են անվանական՝ զոհվածների անուններով:  

Նորաստեղծ այգին կոչվել է «Հաղթանակի», սակայն Լենինականում ընդունված է եղել և մինչև հիմա էլ գործածվում է այգու անվան ռուսական տարբերակը, բայց ոչ թե «Պոբեդա», այլ «Պաբեդայի սադ» ձևով: Ներկայում էլ տեղացիների խոսակցականում կարելի  է լսել՝ «արի Պաբեդայի սադ», «Պաբեդայի սադի քովը քեզի կսպասեմ», «Պաբեդայի սադի կռուգը կդառնաս» և այլ նմանատիպ արտահայտություններ: Խորհրդային տարիներին այստեղ երբեմն-երբեմն, ամռան վերջին ու աշնան սկզբին կազմակերպվել են Լենինականում գործող տեքստիլ և արդյունաբերական գործարանների արտադրանքի տոնավաճառներ: Այգու՝ հատկապես շուկային մոտ հատվածը, գյուղերից եկածների հանգստանալու վայրն էր: Այստեղ պաղպաղակ էին ուտում, գնումները դասավորում և ժամանակ կարճում, եթե ցանկություն չկար ավտոկայանում տրանսպորտին սպասելու:

1988թ․-ի երկրաշարժից հետո «Հաղթանակի» այգում զանգվածային ծառահատումներ չեղավ,  ծառերը մասնակի հատվեցին: Քաղաքի բնակիչները չէին մոռացել, որ այդ ծառերը պատերազմում զոհված իրենց հայրենակիցների կյանքի շարունակության խորհրդանիշն են, և հիմա էլ այգում կարելի է հանդիպել հաստաբուն հսկաների, որոնց տարիքն անցնում է կես դարը: 2012-2016թթ-ին այգում եղել է ծառատունկ, նոր նստարաններ ևս տեղադրվել են, սակայն գրեթե 10 տարի է` նորոգման կամ վերականգնման աշխատանք չի տարվել հատկապես այգու 2-րդ և 3-րդ հատվածներում:

2026թ․-ի Գյումրու Մասնակցային բյուջետավորման ծրագրով տարեսկզբին քվեարկության առաջադրված երեք ծրագրերից հաղթել էր «Հաղթանակի» զբոսայգու զարգացման և համալիր բարեկարգման ծրագիրը (առաջարկի հեղինակ՝ Անահիտ Ղազարյան): Անցած տարի Մասնակցային բյուջետավորման ծրագրի համար Գյումրուն Կառավարությունը հատկացրել էր 90 մլն դրամ: Ծրագրի տապալումից հետո կար մտավախություն, որ համայնքը կզրկվի մասնակցության հնարավորությունից, սակայն ՏԿԵ նախարարությունում որոշել էին Գյումրուն դարձյալ հատկացում անել՝ այս անգամ 86 մլն դրամի չափով: 

Ծրագիրը, որի օգտին քվեարկել են գյումրեցիները, ըստ ներկայացված առաջարկի, վերաբերում է այգու ողջ տարածքին: Նպատակն էր գործարկել Գյումրու «Հաղթանակի» զբոսայգու զարգացման և արդիականացման ծրագիր՝ այն վերածելով բազմաֆունկցիոնալ, անվտանգ և հարմարավետ հանրային տարածքի՝ ներառելով  ենթակառուցվածքների բարելավում, կանաչապատման իրականացում, ժամանցային և ակտիվ հանգստի գոտիների ստեղծում։ 

Մասնակցային բյուջետավորման ծրագրի պահանջներից է, որ համայնքից եկող առաջարկների հեղինակները, թեկուզ մոտավոր, բայց պետք է ներկայացնեն նաև ծախսային հաշվարկ: Հաղթող ծրագրում նմանատիպ հաշվարկները բացակայում են, հեղինակներն առաջարկն արել են՝ հետագա գործողություններն ու քայլերի պլանավորումը թողնելով քաղաքապետարանին: 

Այս ծրագրով գումարային ներդրումը պետություն-համայնք՝ 80/20 հարաբերակցությամբ է:  86 մլն դրամից Կառավարության մասնաբաժինը կազմում է 68 մլն 800 հազար դրամ, իսկ համայնքինը՝ 17 մլն 200 հազար դրամ: Քանի որ ծրագրի առաջարկի հեղինակները չէին հաշվարկել տարածքով հոսող ստորգետնյա ջրերի պրոբլեմն ու դրա լուծման շինարարական ուղիները, քաղաքապետարանի քաղաքաշինության բաժնում կատարած հաշվարկներից ու նախագծային աշխատանքներից հետո ծրագրի արժեքը կրկնակի աճել է: Գյումրու ավագանին համայնքային միջոցներից ծրագրի համար հաստատել է 103 մլն դրամի ներդրում, Կառավարության մասնաբաժինը կազմել է 69 մլն դրամ (այսինքն՝ ծրագիրը 86 մլն դրամից դարձել է 172 մլն դրամ), իսկ շինարարական մրցույթ հայտարարվել է 179 մլն դրամի շրջանակում: 

Ըստ կազմած նախագծի՝ նշված գումարը բավարարելու է այգու միայն մեկ հատվածի բարեկարգմանը (250 մ երկարություն, 27,56 մ լայնություն)։ Կատարվելու են ստորգետնյա ջրատարի մաքրում, կանաչ տարածքների բարեկարգում, նոր նստարանների տեղադրում, առկա ջրավազանի վերականգնում՝ ևս երկուսի ավելացում, երեխաների համար խաղային տարածքի ձևավորում և այլն: Թե որ աշխատանքի համար որքան գումար է նախատեսված ծրագրով՝ հրապարակված չէ, չկա հետազոտություն այգում առկա ծառատեսակների վերաբերյալ, և հայտնի չէ, թե հին, վնասված ծառերը հատումից հետո նորերով փոխարինվելու են, թե ոչ: Ամեն դեպքում, քաղաքային իշխանությունները հույս ունեն, որ շինարարական մրցույթի մասնակից կունենան և նախորդ տարվա տապալված ծրագրի պատմությունը չի կրկնվի: