Տեսանյութեր
Լուսանկարներ
Ախուրյան համայնքում, մինչև տարեվերջ, կսկսի գործել մոդուլային սպանդանոցը
Շիրակի մարզում անասնագլխաքանակի անկման պատճառներից մեկը սպանդանոցների բացակայությունն է. պետությունը տուգանում է ոչ սպանդանոցային մորթի համար, սակայն սպանդանոցներ չի կառուցում: Ախուրյան համայնքը որոշել է հարցը լուծել սեփական ուժերով՝ ձեռք բերելով շարժական մոդուլային սպանդանոց, որը կգործարկվի մինչև տարեվերջ:
Այս տարվա փետրվարի 3-ին Շիրակի մարզի անասնապահներն ու մսավաճառները հավաքվել էին մարզպետարանում՝ բողոքելով սպանդանոցների բացակայությունից և ՀՀ սննդամթերքի անվտանգության տեսչական մարմնի սահմանած տուգանքներից: Նրանք պահանջում էին, որ պետությունն օրենքներ գրելուն զուգահեռ կարողանա նաև դրանց կատարումն ապահովել, այսինքն՝ սպանդանոցներ կառուցի, բայց դրա փոխարեն միայն տուգանում է ոչ սպանդանոցային մորթի միս վաճառելու համար:
«Կառավարությունը պետական սպանդանոց չի կառուցում, կառավարությունը հնարավորություն է ստեղծում: Մենք համայնքապետերի հետ քննարկում ենք տարբեր սուբվենցիոն կամ այլ միջոցներով համայնքապատկան սպանդանոցներ կառուցելու տարբերակներ: Եթե վաճառած մսի պատճառով դժբախտ դեպք պատահի, պատասխանատվությունը կրելու է մսավաճառը: Միսը պետք է ստուգված լինի և անվտանգ»,- լրագրողների հետ զրույցում ասել էր Շիրակի մարզպետ Դավիթ Առուշանյանը:
Ախուրյան խոշորացված համայնքում սպանդանոց ունենալու հետ կապված գործնական քայլեր արվել են դեռ 2025թ.-ի հոկտեմբերին: Համայնքը շարժական մոդուլային սպանդանոց ձեռք բերելու նպատակով երկու գնային հարցում էր կատարել՝ «Վետ Հոլդինգ» ԱՊԸ-ից և «Հարությունյան Կոնսալտինգ» ՍՊԸ-ից: 2025թ.-ի դեկտեմբերին Ախուրյանի համայնքապետարանի և «Վետ Հոլդինգ» ԱՊԸ-ի միջև կնքվել է գույքի գնման պայմանագիր՝ 49.400.000 դրամի սահմաններում, պայմանագրի երրորդ կողմ է հանդես եկել «Հայաստանի Զարգացման և Ներդրումների Կորպորացիա» ՈՒՎԿ փակ բաժնետիրական ընկերությունը:
ՀՀ Ագրոպարենային ոլորտի սարքավորումների լիզինգի աջակցության ծրագրի շրջանակում և Հայաստանի Զարգացման և ներդրումների Կորպորացիայի (DICA) կողմից Ախուրյան համայնքին լիզինգային եղանակով տրամադրվել է շարժական մոդուլային սպանդանոց: ՀՀ կառավարության սուբսիդավորման արդյունքում լիզինգը տրամադրվել է 2 % տարեկան տոկոսադրույքով: Ախուրյանի համայնքապետարանից հունիսի 22-ին տեղեկություն էին տարածել, որ սպանդանոցը կգործարկվի մեկ ամսից: Սակայն, «Հետք»-ի տեղեկություններով, այն դեռ գործարկման փուլում չէ, քանի որ մոդուլային հատվածի տեղադրումից զատ, անհրաժեշտ է տարածքում լրացուցիչ աշխատանքներ կատարել՝ ցանկապատում, անձնակազմի համար փոքր շինության կառուցում: Աշխատանքներն ընթացքի մեջ են, և միայն դրանց ավարտից հետո, մինչև տարեվերջ, մոդուլային սպանդանոցը կսկսի գործել: Այն տեղադրված է Ախուրյան բնակավայրի վարչական տարածքում և ապահովում է հարմար տրանսպորտային հանգույց ոչ միայն Գյումրիի, այլև 20 գյուղական բնակավայրերի համար:
Սպանդանոցի գործարկումը հնարավորություն կտա տարածաշրջանում գյուղատնտեսական կենդանիների սպանդն իրականացնել սննդամթերքի անվտանգության ապահովման արդիական ստանդարտներին համապատասխան՝ սպառողներին մատակարարելով որակյալ ու անվտանգ սնունդ: Մոդուլային սպանդանոցի արտադրողականությունը՝ խոշոր եղջերավոր անասուն 1-10 գլուխ մեկ հերթափոխում, մանր եղջերավոր անասուն՝ 1-ից 100 գլուխ մեկ հերթափոխում, խոզեր՝ 1-ից 20 գլուխ մեկ հերթափոխում: Համալրված սառնարանային հատվածով՝ մինչև 6 գլուխ խոշոր և 30 գլուխ մանր եղջերավոր, 20 գլուխ խոզի մսեղիքի պահպանման համար: Մոդուլային սպանդանոցն ապահովելու է մորթի և մսեղիքի վերամշակում:
Շիրակի մարզպետարանի գյուղատնտեսության և շրջակա միջավայրի պահպանության վարչության անցած տարվա հրապարակման համաձայն՝ մարզում հաշվառված է մոտ 62 հազար գլուխ խոշոր եղջերավոր անասուն. ընդ որում՝ նախորդ տարիների համեմատ արձանագրվել է անասնագլխաքանակի նվազում։ Ախուրյանի համայնքապետարանի տրամադրած տվյալներով՝ համայնքում առկա է 16 515 խոշոր և 15539 մանր եղջերավոր անասուն: Գյուղացիական տնտեսությունները մի շարք պատճառներով կրճատում են ունեցած անասնագլխաքանակը: Պատճառներից մեկն էլ հասանելի սպանդանոցների բացակայությունն է:
Ֆիզիկական անձանց պետությունը ևս առաջարկում է օգտվել լիզինգի եղանակով մոդուլային սպանդանոց տեղադրելու ծրագրից: Ըստ հաշվարկի, միջին հզորության մոդուլային սպանդանոց ձեռք բերելու համար պահանջվում է 12 մլն դրամ, տնտեսվարողի մասով կանխավճարը կկազմի մինչև 400 հազար դրամ, մնացած մասը սուբսիդավորում է պետությունը: Լիզինգի տարեկան տոկոսադրույքը կազմում է 2-3 տոկոս: Շարժական սպանդանոցն ավելի թանկ է, քանի որ ընդհանուր ծախսերին գումարվում է նաև տրանսպորտայինը:
Մասնավոր հատվածը չի շտապում վարկային բեռ վերցնել՝ հաշվի առնելով նաև նախկին ձախողված փորձերը։ Օրինակներից մեկը Անի խոշորացված համայնքի Հայկաձոր բնակավայրում 2022թ․-ին «Բոմ» ՍՊԸ-ին պատկանող սպանդանոցն էր, որի հանդիսավոր բացմանը մասնակցել էր նաև այդ ժամանակվա մարզպետ Նազելի Բաղդասարյանը: Սակայն սպանդանոցը ոչ մի օր չաշխատեց, փակվել էր թերի փաստաթղթավորման պատճառով:
Ներկայում, ըստ Շիրակի մարզպետարանի ունեցած տեղեկության, մարզում ընդամենը երկու քաղաքացի է ցանկություն հայտնել փոքր սպանդանոց կառուցելու, իսկ Աշոցք խոշորացված համայնքում որոշել են մոդուլային սպանդանոց տեղադրել համայնքային միջոցներով:
Դիտեք նաև՝
Մեկնաբանել