Սպիտակ տան մամուլի քարտուղար Քեթի Զաքարիան հեռացվել է զբաղեցրած պաշտոնից։ Այդ մասին գրել էր The New York Times-ը։ Ավելի ուշ Սպիտակ տունը BBC-ին հաստատել էր տեղեկատվությունը։ 

Ավելի վաղ Fox News-ը հայտնել էր, որ շուտով կարելի է ակնկալել Զաքարիայի հրաժարականը։ Թրամփի բարձրաստիճան խորհրդականներից մեկն էլ Axios պարբերականին նշել էր, որ մի քանի օրվա ընթացքում սպասում է իր պաշտոնից Զաքարիայի հրաժարականը։ 

Սպիտակ տունը դեռևս որևէ մեկնաբանություն չի տվել։

Դոնալդ Թրամփի խոսքով՝ նա Զաքարիային կոչ է արել վերաիմաստավորել իր աշխատանքը։ «Ես նրան ասացի. «Կարծում եմ, որ լավ կլինի հեռանաս ու երջանիկ լինես։ Անկեղծ ասած, քո փոխարեն ես կվերանայեի որոշումը։ Մտածիր այդ մասին»,- լրագրողներին հայտարարել է Թրամփը՝ մեկնաբանելով Զաքարիայի հետ իր զրույցը։ 

Թրամփը նաև հավելել է, որ մամուլը դաժան է եղել Զաքարիայի նկատմամբ, ու ինքը երբեք նման բան չի տեսել:

Հիշեցնենք, որ Սպիտակ տունը մամուլի քարտուղարի պաշտոնում Քեթի Զաքարիայի նշանակման մասին հայտարարեց հոկտեմբերի 9-ին։ Իր առաջին ճեպազրույցը նա անցկացրել է հոկտեմբերի 13-ին։ Այն տևել էր 15 րոպեից մի փոքր ավելի, որի ընթացքում Զաքարիան խոսքի իրավունք էր տվել միայն երեք լրագրողի, այն էլ պահպանողական թևից, ու չէր կարողացել պատասխանել բոլոր հարցերին: Դրանից հետո Թրամփի վարչակազմում կարծիք էին հայտնել, որ նա իր պաշտոնում «անհաջող է սկսել աշխատանքը»։

Թրամփը Զաքարիային փաստաբան էր անվանել, իսկ վերջինս Fox News-ի եթերում հանդես էր գալիս որպես իրավաբան։ Սակայն լրագրողները չէին կարողացել հաստատել, որ Քեթի Զաքարիան հանձնել է իրավաբանի որակավորման քննություն։ Ավելի ուշ, Սպիտակ տան արդեն նախկին մամուլի քարտուղարը խոստովանել էր, որ չի հանձնել այդ քննությունը։

Լուսանկարը՝ Reuters գործակալության