Ազգային ժողովում շարունակվում է «Կուտակային կենսաթոշակների մասին» ՀՀ օրենքում լրացումներ եւ փոփոխություններ կատարելու մասին կառավարության ներկայացրած օրենքի եւ հարակից օրենքների փոփոխությունների նախագծերի փաթեթի բուռն քննարկումները: Փոփոխությունների փաթեթին դեմ են արտահայտվում ընդդիմադիր պետգամավերները:

ՀԱԿ խմբակցության պատգամավոր Հրանտ Բագրատյանին մտահոգում էր, թե կառավարությունն ինչու է այլ երկրների փորձը վերցրել, երբ այդ երկրներում եւ տնտեսությունն է զարգացած, եւ մեկ շնչին բաժին հասնող համախառն ներքին արդյունքը:

Ըստ ընդդիմադիր պատգամավորի' մեր երկիրն աղքատ է, եւ եթե չլինեն Ռուսաստանից եւ այլ երկրներից եկող տրանսֆերտները, եւ տնտեսության, եւ երկրի ազգաբնակչության վիճակը կտրուկ կվատանա:

«Աղքատ երկրում սխալ է ներդնել կուտակային համակարգը: Բացարձակապես անտեղի է Չիլիի կամ Էստոնիայի փորձը ներդնել Հայաստանում: Էստոնիան միջինից բարձր զարգացած երկիր է, նրա թիկունքում կանգնած են Եվրոպան ու հզոր եվրոն, որը նույնպես տատանվում է: Բացի այդ, ինչպե՞ս եք պատրաստվում փոխհատուցել ինֆլյացիան»,- հարցրեց Հրանտ Բագրատյանը:
Նա դեմ է, որ գործընթացը գնում է պարտադրանքի ուղով: Հրանտ Բագրատյանի ասելով' Հայաստանի նման աղքատ երկրներում սկզբում պետք է համակարգը լինի կամավոր եւ խրախուսվի կառավարության կողմից, ինչպես որ առաջարկում է ՀԱԿ-ը: Բագրատյանը մտահոգված է նաեւ, որ կուտակված գումարը պահվելու է երկրից դուրս, մինչդեռ, պատգամավորի ասելով, ավելի նպատակահարմար է, որ այն ներդրվի երկրի տնտեսության մեջ, օրինակ' կառուցվեն դպրոցներ, կամուրջներ եւ այլն:

ՀՅԴ խմբակցության պատգամավոր Արծվիկ Մինասյանն էլ ասաց, թե այս համակարգին անցնելով' գործատուները ստիպված են լինելու զերծ մնալ նոր աշխատատեղեր ստեղծելու մտքից: Ըստ նրա' ցանկացած նոր աշխատատեղ ենթադրվում է կենսաթոշակային համակարգին որոշակի պարտադիր գումարների վճարում:

«Մենք պնդում ենք, որ Հայաստանում պետք է ներդնել կամավոր կուտակային համակարգ, ինչը չի բերի ֆինանսական շուկաների ռիսկի: Մինչդեռ ակնհայտ է, որ ռիսկն առկա է պարտադիր կուտակային համակարգին անցում կատարելու պարագայում»,-ավելացրեց Ա. Մինասյանը:

Պատգամավորն առաջարկեց, որ այս նախագծի ճակատագիրը որոշվի հանրաքվեի միջոցով, քանի որ այն վերաբերում է սերունդներին: