Հայաստանի և Վրաստանի միջև սննդամթերքի անվտանգության, անասնաբուժության և բուսասանիտարիայի բնագավառներում համագործակցության շրջանակներում Թբիլիսիում կայացել է Վրաստանի շրջակա միջավայրի պահպանության և գյուղատնտեսության նախարարության պարենի ազգային գործակալության պետ Գեորգի Իակոբաշվիլիի և ՀՀ սննդամթերքի անվտանգության տեսչական մարմնի ղեկավար Տիգրան Պետրոսյանի հանդիպումը։ Այս մասին հայտնում են ՍԱՏՄ տեսչական մարմնից։

Քննարկվել են սննդամթերքի անվտանգության, բուսասանիտարիայի, անասնաբուժության բնագավառներում և սահմանային անցակետերում իրականացվող վերահսկողության արդյունավետության բարձրացմանն առնչվող ընթացիկ հարցերը՝ ընդգծելով հատկապես ամանորյա տոներին ընդառաջ առևտրաշրջանառության ակտիվացման պայմաններում ներմուծվող և արտահանվող ապրանքների նկատմամբ իրականացվող ստուգումները խստացնելու անհրաժեշտությունը։

Անդրադարձ է կատարվել բուսական և կենդանական ծագման հայկական արտադրանքի՝ Վրաստան արտահանման, ինչպես նաև Վրաստանի տարածքով դեպի այլ երկրներ տարանցիկ փոխադրումներին, երկու երկրների տարածքում կարանտին վնասակար օրգանիզմների դեմ պայքարի միջոցառումների արդյունավետությանը վերաբերող հարցերին։

Կողմերը կարևորել են համագործակցության հետագա ընդլայնման անհրաժեշտությունը երկուստեք հետաքրքրություն ներկայացնող ոլորտներում։