HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

ԱՅԼԸ․ ԱՎԱԳ ԵՓՐԵՄՅԱՆ

ՊԱՐԱԳԻՐ

Ես կծկվում եմ` ծածկվում բառի խառնակույտով:
Եւ բառերի դատարկ ակնախոռոչներից
Արցունքներն են կաթում բառի արքաների:

Կյանքը շատ է սիրում ստեպ-ստեպ նահատակվել`
Մեղադրելով իրեն անհույս սիրողներին`
Ճամփի խոսքերն հանկարծ դարձնում արկանելի:

Իսկ երբ ողջ ու մեռյալ սարսուռներն են մեկվում,
Այս Աշխարհը սպասում կոչած հայացքները
Փշուր-թափթփվում են ցասման սալքարերին.

Էլ ուշքի չեն գալիս, պարտակվում է ուշքը
Վաղորդայնի վիհում, որտեղ միշտ է եղել
Երկինքն ի վեր ստելն – այդքան – անկարելի:

 

ԱԼՔ

Ջրերը – մակընթաց, տեղատու –
վերջնավճիռ են տեսնում
գոյության մեջ հսկա քարերի,
որոնց երազներում… ալիքներ են ծփում…

Այստեղ նույնն ենք:

Ճակատագրության թիրախը
բանաստեղծությունն է,
միակը,
որը կշրջանցի ճակատագիրը...

Այստեղ` տարբեր:

Ճչա՞լ, թե՞ չճչալ բառը:
Անապատի մասին չէ,
որ խոսում եմ,

այլ` որ այս բանաստեղծության
դուռը չեմ փակելու, ինչ է թե
շեմին ոչ ոք չկա:

Ահա ինչպիսի վճիռներ են ծփում
մարդու արդեն քարե սրտում,
երբ արժանանում է
մի քանի բառ էլ
ինքը իր համար գրելու բախտին,

հասկանալի,
անչափ հասկանալի մի աշխարհում,

մի երեկո, որը…
նույն անդունդն է, որտեղ…

Կենաց Ծառն է աճում,
մարդուց թաքուն:

 

ԵՐԿՈՒ ՃԵՊԱՆԿԱՐ

1.

Տղմուտ, պատահական
ու կանխակալ`
կյանքը
մոտակայքն է:

Մոտակայքում միայն
կեսարներ են,
նրանց կողքին`
իրենց զեռունները:

Պարզ գծեր են`
ոչ մի խորապատկեր,
ոչ մի հեռանկար:

Հեռանկարների տեղից
մի քայլ այնկողմ`

միշտ գրկաբաց,
իրենց տրտմության մեջ
պատահական մարդուց ազատ
ու փղձկալու պատրաստ
հեռուները:

2.

Վերեւներից
ոչինչ չի երեւում,

սակայն պարզ լսվում է
վերեւների համար
լացող ձայնը:

 

ԱՄԲՈՂՋ ԿՅԱՆՔ

Ամեն օր հեռանում եմ
փոքր քաղաքից`
ամեն օր հաստատվելով
փոքրացող քաղաքում:


Ինձ հետ միայն իմ սեւ
ագռավներն են,
կյանքն են
աղղ-աղղ-ղաա-կուում:

 

ԱՅԼԸ

Թե` մարդու տեղը չարիքի մեջ է:
Թե` մինչեւ փոքրիկ ճրագի վերջը
դեռ կշնչի:

Թող: Երկինք հյուսիր: Անհառելի:
Նորը: Հելունով ԱՅՆ բառերի,
որ չեն հնչի:

Lուսանկարները՝ Ֆրունզ Ավետիսյանի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter