«Նոյյան տապան» լրատվական կենտրոնում նախօրեին կայացավ լրագրողների հետ հանդիպում, որը  նվիրված էր Հայաստանի դպրոցներում բարձր տեխնոլոգիաների ներդրման խնդիրներին և լուծումներին: Բանախոսներն էին  «Dasaran.am» կրթական ծրագրի հիմնադիր Սուրեն Ալոյանը, Երևանի թիվ 118 ավագ դպրոցի տնօրեն Կարինե Հովակիմյանը, Մուղնու միջնակարգ դպրոցի օպերատոր Մերի Խոջոյանն ու «Հայ կրթություն» կրթական հիմնադրամի օպերատոր Նարինե Թունյանը:  

«Dasaran.am-ը շատ օգտակար և կարևոր գործիք է կրթական գործընթացների կազմակերպման համար, ծրագրի գործարկվելու պահից աշակերտներն ու ուսուցիչները բավական ոգևորված են»,- ասաց Մուղնու միջնակարգ դպրոցի օպերատոր Մերի Խոջոյանը: 

Իսկ «Հայ կրթություն» կրթական հիմնադրամի օպերատոր Նարինե Թունյանը կարծիք հայտնեց, որ կայքը, որպես կրթական գործընթացի աջակից, հիմնովին կայացել է: 

Կրթական ծրագրի հիմնադիր Սուրեն Ալոյանը ներկայացրեց ծրագիրը և տեղեկացրեց, որ այսօր 352  դպրոց միացած է կայքին, և նշեց, որ Dasaran.am-ը նոր է թափ հավաքում՝ այսօր արդեն գրանցելով օրական 25000-30000 այցելություն: «Այս կրթական ծրագիրը, որը մեր գլխավոր գործընկեր ՎիվաՍել-ՄՏՍ-ի շնորհիվ գործում է անվճար, բավական մեծ հետաքրքրություն է առաջացրել թե´ ծնողների, թե´ աշակերտների, և թե´ ԿԳ նախարարության ու Երևանի քաղաքապետարանի համապատասխան ստորաբաժանումների մոտ»,-ընդգծեց կրթական ծրագրի հիմնադիրը: 

«Նշեմ, որ Dasaran.am-ը շատ ճկուն է. երբ մեր դպրոցը տեղեկացրեց իր առանձնահատուկ կրթական մեթոդաբանության մասին, կրթական ծրագիրն արագ արձագանքեց և համակարգը կարճ ժամանակում վերամշակելով՝ համապատասխանեցրեց մեր դպրոցի առանձնահատկություններին»,- իր հերթին ասաց Երևանի թիվ 118 ավագ դպրոցի տնօրեն Կարինե Հովակիմյանը: 

Անդրադարձ եղավ նաև Dasaran.am կայքի «Հոգեբանի անկյուն» բաժնին, որը, ըստ ծրագրի հիմնադրի, գործում է շատ ակտիվ, աշակերտները դիմում են որակավորված մասնագետներին ամենատարբեր հարցերով ու խնդիրներով: 

Հիշեցնենք, որ համապատասխանաբար 2011թ. օգոստոսին և  ս.թ. փետրվարի 8-ին ՀՀ ԿԳ նախարարության և Երևանի քաղաքապետարանի հետ ստորագրվել են համագործակցության հուշագրեր, համաձայն որոնց` «Dasaran.am» կրթական ծրագիրն ստացել է պետական հովանավորություն և դարձել պարտադիր ՀՀ բոլոր հանրակրթական դպրոցների համար: