ՀՀ փոխվարչապետ, տարածքային կառավարման նախարար Արմեն Գեւորգյանն այսօր հանդիպեց Եվրոպայի խորհրդի տեղական եւ տարածքային իշխանությունների կոնգրեսի դիտորդական առաքելության պատվիրակության հետ: Առաքելության ղեկավար Անրի Ֆերալը փոխվարչապետին խնդրեց պատվիրակության անդամներին ներկայացնել ընտրությունների վերաբերյալ իր մոտեցումները:

Փոխվարչապետը եւս մեկ անգամ շնորհակալություն հայտնեց Կոնգրեսի կողմից Հայաստանի կառավարության հրավերն ընդունելու համար: Նա կարեւորեց  դիտորդական առաքելության իրականացումը` նկատելով, որ դա առաջին հերթին ԵԽ  գործընկերներին հնարավորություն կտա համոզվել, որ Հայաստանի ստանձնած պարտավորությունները կատարվում են, Հայաստանում ժողովրդավարական գործընթացներն անշրջելի են, եւ ընտրությունից ընտրություն ընտրական գործընթացներն ավելի են կատարելագործվում: «Տարվա ընթացքում ՏԻ մարմինների բոլոր երեք ընտրություններն անցակացվել են կազմակերպված, ժողովրդավարական սկզբունքներին ու  Ընտրական օրենսգրքում ամրագրված ընթացակարգերին համապատասխան եւ մրցակցային պայմաններում»,-նշեց փոխվարչապետը:

Նա անդրադարձավ նաեւ նոր ԸՕ-ում կատարված  սկզբունքային փոփոխություներին` նշելով, որ դրանք ուղղված են  եղել ընտրական գործընթացների մասնակիցների պատասխանատվության բարձրացմանը: Մասնավորապես խոշոր համայնքներում ավելացվել է ավագանու անդամների թիվը,  մեծացվել է կուսակցությունների դերը. կուսակցություններին եւս ինչպես համայնքի ղեկավարի, այնպես էլ ավագանու անդամի թեկնածու առաջադրելու հնարավորություն է ընձեռվել:

Փոխվարչապետի խոսքով` բոլոր թեկնածուները մինչեւ ընտրությունները եւ դրանց  ընթացքում հավասարապես ունեցել են սահմանված  հնարավորությունները` ինչպես առաջադրվելու, գրանցվելու, այնպես էլ քարոզչություն իրականացնելու առումով: Քարոզչության սահմանափակման հետ կապված բողոքներ կամ դժգոհություններ  չեն եղել: Բավականին սուր մրցակցություն է եղել ինչպես համայնքի ղեկավարների, այնպես էլ ավագանու անդամների թեկնածուների միջեւ:  Քվեարկության օրն  անցել է բավական հանգիստ, առանց որեւէ լուրջ միջադեպի,  ընտրությունների արդյունքները նույնպես ամփոփվել են օրենքի բոլոր պահանջներին համապատասխան:

Փոխվարչապետը նկատեց, որ ընտրությունների արդյունքները բողոքարկվել են ընդհանուր առմամբ 8 դեպքում: Բոլոր տեղերում կատարվել է վերահաշվարկ, եւ  հանձնաժողովի կողմից արձանագրված արդյունքների հետ որեւէ էական տարաբերություն չի բացահայտվել:

Ընտրությունների օրը ստացված ահազանգերը գրանցվել են իրավապահ մարմինների կողմից,  դրանցից որոշների  մասով  ուսումնասիրություններ են կատարվում, եւ փաստերը հաստատվելու դեպքում` կլինեն համարժեք գնահատականներ:

Ընտրացուցակների առումով եւս  խնդիրներ չեն արձանագրվել: «Եթե 3-4 տարի առաջ ընտրությունների ժամանակ հիմնականում մատնանշվում էին ցուցակների անլիարժեքության, քարոզչության եւ ընտրությունների  անցկացման ժամանակ անհավասար պայամանների, ընտրությունների արդյունքների ամփոփման հետ կապված խնդիրներ, ապա այսօր  նշված գործընթացներում խնդիրներ չեն արձանագրվել: Սեպտեմբերի 9-ին ընտրությունները տեղի են ունեցել գործող օրենսդրությանը համապատասխան, եւ լիահույս եք, որ  նույն մոտեցումներով կանցկացվեն սեպտեմբերի 23-ի ընտրությունները»,-նշեց փոխվարչապետը:

Նա նաեւ պատասխանեց ընտրական գործընթացի վերաբերյալ պատվիրակության անդամների հարցերին:

Նշենք, որ Եվրոպայի խորհրդի տեղական եւ տարածքային իշխանությունների կոնգրեսի դիտորդական առաքելության պատվիրակությունն ընդլայնված կազմով կհետեւի նաեւ սեպտեմբերի 23-ի ընտրությունների ընթացքին:

ՏԿՆ հասարակայնության հետ կապերի բաժին