Փոխվարչապետ, տարածքային կառավարման նախարար Արմեն Գեւորգյանն այսօր խոհրդակցություն անցկացրեց Շիրակի մարզպետարանում, որի ընթացքում քննարկվեցին համայնքներում սեփական եկամուտների հավաքագրմանը, մարզում իրականացվող ծրագրերին առնչվող, ինչպես նաեւ ընթացիկ այլ հարցեր: Խորհրդակցությանը մասնակցում էին մարզպետ Աշոտ Գիզիրյանը, մի շարք համայնքների ղեկավարներ, մարզպետարանի պատասխանատուներ:

Մարզի համայնքներում 2012թ. սեպտեմբերի 1-ի դրությամբ սեփական եկամուտների կատարողականը կազմել է 69,9 տոկոս, հողի հարկինը` 54,8 տոկոս: Խորհրդակցության մասնակիցների ուշադրությունը հրավիրելով այս ցուցանիշներին` փոխվարչապետը հորդորեց քայլեր ձեռնարկել դրանց բարելավման ուղղությամբ:

Անդրադառնալով արդյունավետ վարչարարության խնդիրներին` Ա. Գեւորգյանը հատկապես կարեւորեց ընթացիկ բյուջեների կատարման եւ նոր ապառքների չկուտակման հանգամանքը: Փոխվարչապետը եւս մեկ անգամ ընդգծեց, որ դրան էր ուղղված նաեւ այս տարվա գարնանն ընդունված տեղական հարկերի մասին օրենսդրական փաթեթը, որով բազաներից հանվում են անհուսալի ապառքները, եւ հնարավորություն է ընձեռվում ձեւավորել առավել իրատեսական բյուջեներ ու ամբողջությամբ կատարել դրանք: Կարեւորելով բյուջետային կարգապահությունը` նա հիշեցրեց, որ տեղական հարկերի ոչ պատշաճ հավաքագրումն առաջին հերթին հարվածում է համայնքին` տեղական բյուջեն զրկելով եկամտային աղբյուրներից:

Փոխվարչապետը հիշեցրեց նաեւ, որ օրենսդրական փաթեթով սահմանված արտոնություններից բնակիչները կարող են օգտվել մինչեւ 2012թ. դեկտեմբերի 31-ը` վճարելով նախորդ տարիների գույքահարկի եւ հողի հարկի մայր գումարները եւ ազատվելով դրանց համար հաշվարկված եւ չվճարված տույժերի եւ տուգանքների վճարումից:

Խորհրդակցության ընթացքում փոխվարչապետին զեկուցվեց նաեւ մարզի առաջնահերթ խնդիրների լուծման ծրագրի երրորդ փուլի ընթացքի մասին: Նշվեց, որ արդեն իրականացվել է նախատեսված աշխատանքների 92,5 տոկոսը: Քննարկվեցին նաեւ ընթացիկ այլ հարցեր:

Այցի շրջանակում Ա. Գեւորգյանը ներկա գտնվեց Գյումրիի թիվ 6 երաժշտական դպրոցի հիմնարկեքի արարողությանը: Շինարարությունը նախատեսվում է ավարտել 2013թ. ամռանը: Դպրոցն ավերվել էր երկրաշարժի ժամանակ եւ առ այսօր գործում է տնակային պայմաններում:

Դպրոցի կառուցման ծրագիրը նախաձեռնել էին ՀՕՖ-ը, «Do Something» կազմակերպությունն (որի ղեկավարը «Ռոքն օգնում է Հայաստանին» ծրագրի նախաձեռնող Ջոն Դին է) ու «Մեդիամաքս» գործակալությունը: Ֆինանսական աջակցություն է ցուցաբերել Մարդիգյան ընտանիքի հիմնադրամը, ծրագրին իր մասնակցությունն է ունեցել նաեւ ՀՀ նախագահը: Ընդհանուր առմամբ այդ նպատակի համար հավաքվել է մոտ 450 հազ. դոլար:

Փոխվարչապետը շնորհակալություն հայտնեց նախաձեռնության հեղինակներին` նրանց հետեւողական ջանքերի համար: Նա նաեւ բարձր գնահատեց դպրոցի մանկավարժների աշխատանքը, ովքեր, չնայած տարրական պայմանների բացակայությանը, նվիրվածությամբ շարունակում են իրենց աշխատանքն ու տաղանդավոր սաներ պատրաստում: Նա վստահություն հայտնեց, որ նոր դպրոցի կառուցումը խթան կլինի` նոր հաջողություններ արձանագրելու, Գյումրիում երաժշտական ավանդույթները շարունակելու համար:

Հասարակայնության հետ կապերի բաժին