Երևանի Կենտրոն վարչական շրջանի պատվիրակությունը ՝ վարչական շրջանի ղեկավար Արա Սադոյանի գլխավորությամբ Մոսկվայի Կենտրոն վարչական շրջանի հրավերով Սեպտեմբերի 21-25-ը աշխատանքային այցով գտնվում էր Ռուսաստանի Դաշնության մայրաքաղաք Մոսկվայում:   

Այցի շրջանակներում պատվիրակությունը հանդիպեց Մոսկվայի Կենտրոն վարչական շրջանի  ղեկավար Սերգեյ Բոյդակովի  հետ:  Հանդիպման ընթացքում կողմերը քննարկեցին  երկկողմ համագործակցության ընդլայնման ծրագրեր, երկու վարչական շրջանների  միջև կրթական, մշակութային և այլ ոլորտների փորձի փոխանակման հարցեր: Այնուհետև Արա Սադոյանի գլխավորած պատվիրակությունը  շրջայց կատարեց  Մոսկվայի Կենտրոն վարչական շրջանի մշակութային օջախներում, մանկապարտեզներում, եղավ  «Ապագայի դպրոց» կրթօջախում, ծանոթացավ դպրոցի կրթական ծրագրերին և ուսուցման  մեթոդներին:  Վերադարձից առաջ  պատվիրակությունը  մասնակցեց Մոսկվայում, սեպտեմբերի 21-23-ը  անցկացվող «Ոսկե նուռ» փառատոնին:

Արդեն 4-րդ տարին  է ՌԴ կառավարության նախաձեռնությամ Մոսկվայում անցկացվում է «Ոսկե նուռ» փառատոնը,որի շրջանակներում ներկայացվում են հայկական արտադության ապրանքներ: Փառատոնը ուղեկցվում է հայկական երգ ու պարով:

Երևանի Կենտրոն վարչական շրջանի ղեկավար Արա Սադոյանը, ելույթ ունենալով փակման արարողությանը, նշեց, որ փառատոնի անցկացումը  կարևորագույն իրադարձություն է ,որը տարեց- տարի ավելի է ամրապնդում հայ- ռուսական բարեկամությունը և հուսով է, որ այն առաջիկայում ավելի կընդլայնվի՝ համախմբելով աշխարհասփյուռ հայությանը:

Երևանի Կենտրոն վարչական շրջանի ղեկավար Արա Սադոյանը հանդիպում ունեցավ նաև Նոր Նախիջևանի եւ Ռուսաստանի Հայոց Թեմի Առաջնորդ Գերաշնորհ Տ. Եզրաս Եպիսկոպոս Ներսիսյանի հետ: Հանդիպման ընթացքում Թեմի առաջնորդը նշեց, որ ուրախալի փաստ է Մոսկվայի քաղաքային իշխանությունների կողմից նման հսկայական տարածքի հատկացումը հայոց թեմին:  Եզրաս Եպիսկոպսը Արա Սադոյանին ծանոթացրեց հայկական թեմի առաջնորդարանի կառուցման գործընթացին, ուր կառուցվելու  են նաև մշակութային օջախներ և հայերի պահպանման համար կարևոր գործոն հանդիսացող՝ հայկական դպրոց:

Աշխատանքային այցի  ավարտին Արա Սադոյանը, շնորհակալություն հայտնելով  Մոսկվայի Կենտրոն վարչական շրջանին ղեկավարին ջերմ ընդունելության համար, վստահեցրեց, որ այցն արդյունավետ էր, և մոտ ապագայում տեսանելի կլինեն երկկողմ համագործակցության եզրերը:

Երևանի Կենտրոն վարչական շրջանը Մոսկովյան պատվիրակությանը սպասում է Հոկտեմբերի 12-15-ը՝  « Էրեբունի - Երևան» տոնակատությունների շրջանակներում: Պատվիրակությունը Երևան այցի ընթացքում կվերահաստատի  Երևանի և Մոսկվայի Կենտրոն վարչական շրջաների միջև առկա բարեկամության հուշագիրը: Այս մասին հայտնում է Կենտրոն վարչական շրջանի լրատվական բաժինը: