Սեպտեմբերի 25-ին ոստիկանությունում տեղի է ունեցել խորհրդակցություն, որը վարում էր ՀՀ ոստիկանության պետ, գեներալ-լեյտենանտ Վլադիմիր Գասպարյանը: 

Խորհրդակցության սկզբում անդրադառնալով  ոստիկանության բարեփոխումների ընթացքին` Վլադիմիր Գասպարյանը նշեց, որ ամենակարևորն այն է, որ ոստիկանությունը գնում է սխալներն ու թերությունները հետևողականորեն շտկելու ճանապարհով, ինչը հաջողության գրավականն է:

Փաստելով, որ փոփոխությունները ոստիկանության աշխատանքում զգալի են, Վլադիմիր Գասպարյանը դրական գնահատեց ստորաբաժանումների աշխատանքը վերջին ամիսներին և, մասնավորապես, տեղական ինքնակառավարման մարմինների ընտրությունների ընթացքում:

Միևնույն ժամանակ Վլադիմիր Գասպարյանը ցավով նշել է, որ ոստիկանության բոլոր գործողությունները չէ, որ համարժեք գնահատական են ստանում հասարակության այս կամ այն շերտի կողմից, ինչը պայմանավորված է առկա կարծրատիպերով ու ոստիկանության հանդեպ կանխակալ վերաբերմունքով:

Մեկ անգամ ևս կարևորելով ոստիկանության հանդեպ հասարակության հավատի ամրապնդման առաջնահերթությունը` Վլադիմիր Գասպարյանն ընդգծել է, որ ծավալուն աշխատանք կա կատարելու արդարության սկզբունքի անվերապահ հաստատման ու հասարակության հետ ոստիկանության համագործակցության ընդլայնման ուղղությամբ:

Խոսելով հասարակության մեջ տարածվող ասեկոսեների մասին` Վլադիմիր Գասպարյանը նշել է, որ ոստիկանության ստվերային գործունեության մասին բամբասանքները ծանր հարված են հասցնում կառույցի հեղինակությանը, և պահանջեց քննության առնել ցանկացած ահազանգ ու կայացնել համարժեք որոշումներ:

Կարևորելով հասարակության բոլոր անդամների կողմից օրենքի և համակեցության կանոնների անվերապահ պահպանման անհրաժեշտությունը` ոստիկանության պետը խնդիրը մասնավորեցրել է, այսպես կոչված` թիկնազորների օրինակով` վերստին հիշեցնելով, որենքի առջև բոլորը հավասար են, և այդ առումով բացառություններ չպիտի լինեն:

Վերստին կարևորելով առաջադրված խնդիրների իրականացման գործում անձնակազմի պատրաստականության նշանակությունը` ոստիկանության պետը տեղեկացրեցլ է, որ մշակվել ու պատրաստվել են թեստեր, որոնք մոտ օրերս կուղարկվեն բոլոր ծառայություններին` առաջիկայում քննություններ կազմակերպելու համար:

Նպատակը ոստիկանների մասնագիտական, անձնային, ինտելեկտուալ որակները ստուգելն ու ըստ արդյունքների միջոցներ ձեռնարկելն է:

Վլադիմիր Գասպարյանն անդրադարձել է նաև հասարակական հնչեղություն ունեցող հանցագործությունների բացահայտման, համակարգում կադրային բարեփոխումների, մասնագիտական պարապմունքներն առավել արդյունավետ կազմակերպելու, ոստիկանական էթիկայի անվերապահ պահպանման խնդիրներին և կրկին ընդգծեց, որ բոլոր այդ ուղղություններով ձեռքբերումներն ամրապնդում են հասարակություն-ոստիկանություն կապը:

Խորհրդակցության ընթացքում քննարկվեցին այլ հարցեր ևս և տրվեցին կոնկրետ հրահանգներ ու ցուցումներ: Այս մասին հայտնում է ոստիկանությունը: