Շենգավիթի ընդհանուր իրավասության դատարանում Նարեկ Հարթունյանի քրեական գործով դատական նիստի սկզբում դատավոր Ռ. Ազարյանը հրապարակեց Հարթունյանի միջնորդությանը մերժելու մասին որոշումը: Նարեկը դատարանին միջնորդել էր` թույլատրել 2012 թ. հոկտեմբերի 18-ից մինչ նոյեմբերի 7-ը Հայաստանից բացակայել` «Նարեկացի» ժողովրդական նվագարանների համույթը համերգների նպատակով Գերմանիա եւ Ֆրանսիա տանելու համար:

 

Համույթի թվով 26 պատանիների ծնողները հավաստիացնում են, որ իրենց երեխաների անվտանգության հիմնական երաշխիքը Նարեկը կարող է լինել, հաշվի առնելով նրա` արեւմտյան մշակույթին ծանոթ լինելը, օտար լեզուներին (ֆրանսերեն և անգլերեն) տիրապետելը,  ինչպես նաեւ այն մեծ վստահությունը, որ ունեն Նարեկի հանդեպ: Նրա ներկայությունը կարեւոր է  նաեւ ֆինանսական հարցերի եւ համերգների կայացման տեսակետից:

 

Հիշեցնենք, որ Նարեկ Հարթունյանը մեղադրվում է «հարկեր վճարելուց չարամտորեն խուսափելու և փողերի լվացման» մեջ: 2011 թվականի դեկտեմբերի 9-ին Նարեկին կալանավորեցին, 3 օր անց բաց թողեցին,  խափանման միջոցը փոխարինվել է երկրից չբացակայելու մասին  ստորագրությամբ, ինչը գործը դատարան ուղարկելուց հետո դատարանի՝ ապրիլի 5-ի որոշմամբ թողնվել էր անփոփոխ:

 

Այժմ դատարանը,  մերժելով Նարեկի միջնորդությունը, նշեց, որ ըստ  ՀՀ Քր. օրենսգրքի 135-րդ հոդված համաձայն՝ խափանման միջոց կիրառվել է նրա համար, որ ամբաստանյալը չթաքնվի  վարույթ իրականացնող մարմնից եւ չխուսափի քրեական պատասխանատվությունից: «Այսինքն՝ կիրառելով խափանման միջոց՝  նախաքննական մարմինները հիմքեր են ունեցել դա անելու, հակառակ դեպքում խափանման միջոց չէր ընտրվի: Նարեկ Հարթունյանի միջնորդությունը մերժելիս հաշվի է առնվում նաեւ այն, որ նա հանդիսանում է արտերկրի քաղաքացի, ում վերագրվում է ծանր հանցագործությունների կատարում»,- ասաց դատավորը:

 

Սակայն Նարեկն իր միջնորդության մեջ էլ հիշատակել էր, որ գործի նախաքննության ժամանակ երեք անգամ մեկնել է Հայաստանից և կամավոր վերադարձել, այն դեպքում, երբ իրոք կարող էր չվերադառնալ:

 

Ստացվում է, որ քննիչի թեթև մտքի ու ձեռքի «շնորհիվ» ` ԱՄՆ քաղաքացի հանդիսացող Նարեկը Հայաստանում պատանդի կարգավիճակում է հայտնվել, այն դեպքում, երբ քննությամբ «ձեռք բերված ապացույցները», որոնք դրված են Նարեկի մեղադրանքի հիմքում, ամիսներ շարունակ դատարանում մեկ առ մեկ հերքվում են:

 

Փաստորեն քննիչ Ռաֆայել Մկրտչյանի «բեղմնավոր գործունեության» հետևանքով այս պահին «Նարեկացի» ժողովրդական նվագարանների համույթի համերգների եվրոպական շրջագայությունը կասկածի տակ է, իսկ Նարեկի գործունեությունը` սահմանափակված: